Ұлттық қауіпсіздік комитеті – мемлекетіміздің қауіпсіздігі мен тыныштығы күзетінде нық тұрған, қазіргі заманға лайықталған арнаулы қызмет. Ел сенімін арқалаған егемен еліміздің қауіпсіздік қызметінің құрылғанына биыл 24 жыл толып отыр. Осыған орай Ұлттық қауіпсіздік комитеті Алматы облысы бойынша департаментінде салтанатты шара өтіп, мемориалдық кешеннің ашылуы болды. Оған облыс әкімі Амандық Баталов қатысты.
Шара комитет қызметкерлерінің сап түзеп, Гимн айтып, Мемлекеттік Туды көтеру рәсімімен басталды. Бұдан соң облыс әкімі Амандық Баталов департамент аумағында бой көтерген мемориалдық кешендегі Ұлттық қауіпсіздік қызметін басқарған Шаймұхан Мұқановқа арналған ескерткіш тақтаны салтанатты түрде ашып, Ұлттық қауіпсіздік қызметі қызметкерлерін мерекемен құттықтады.
– Құрметті Ұлттық қауіпсіздік комитетінің ардагерлері, қызметкерлері! Сіздерді төл мерекелеріңізбен құттықтаймын. 1992 жылдың 13 шілдесінде Президентіміз Нұрсұлтан Әбішұлы Назарбаев еліміздің арнайы қызметін, яғни, Ұлттық қауіпсіздік комитетін құру туралы Жарлыққа қол қойған еді. Дәл осы күн Ұлттық қауіпсіздік комитеті қызметкерлерінің кәсіби мерекесіне айналды. Бұл күнделікті жұмысын мемлекет қауіпсіздігіне арнап отырған азаматтардың мерекесі. Сіздердің жұмыстарыңыздан батыл, қайсар, қажырлы болып, тез шешім қабылдап, қимыл жасау талап етіледі. Бүгінде қауіпсіздік комитеті қызметкерлеріне терроризм, діни экстремизммен күресу міндеті жүктеліп отыр. Бұл мамандықты таңдаған адамдардың өмірінің соңына дейін өз ісіне адал болып қалатынын атап өту қажет. Сіздердің уақытпен санаспайтын күнделікті еңбектеріңіздің арқасында біз тыныштық пен қауіпсіздікте өмір сүрудеміз. Қажырлы еңбектеріңіз үшін алғыс айтқым келеді. Сіздерге мықты денсаулық, бақыт пен тыныштық тілеймін, – деді ол. Амандық Ғаббасұлы осы саланың бірқатар қызметкерін Құрмет грамотасымен марапаттады. Сондай-ақ, Алматы облысы мемлекеттік қызметкерлерінің ІХ жазғы спартакиадасында волейбол жарысында бірінші орын алғаны үшін аталмыш департаменттің құрама командасының капитаны Андрей Сорокинге Мақтау қағазы мен арнайы кубок табыс етті.
Шара барысында сөз алған ҚР Ұлттық қауіпсіздік комитеті Кадрлар департаментінің бастығы, генерал-майор Әбілсейіт Дүйсебаев комитет төрағасының құттықтауын жеткізіп, ең озат қызметкерлерді марапаттады.
Келесі кезекте сөз сөйлеген Ұлттық қауіпсіздік комитеті Алматы облысы бойынша департаментінің бастығы, генерал-майор Сәбит Құрманалиев арнаулы қызмет ұжымының бүгінгі күні алға қойған міндетін мінсіз орындап, ұлтымыздың қауіпсіздігін қамтамасыз ету жолында аянбай еңбек етіп келе жатқанына тоқталып, сонау сұрапыл соғыс жылдарында Жетісудан аттанған қауіпсіздік комитеті қызметкерлерінің кұрметіне 213 ардагердің есімі жазылған ескерткіш тақта ашылып отырғанын жеткізді.
Ұлттық қауіпсіздік комитеті ардагерлер кеңесінің төрағасы, отставкадағы полковник Кенжемұрат Бекназаров та жүрекжарды лебізін жеткізіп, бүгінде ескерткіш тақтаға есімі жазылған Шаймұхан атаның қасында 18 жыл бірге қызмет еткенін айтып, «ол нағыз аңыз адам, ерен ерліктің үлгісі» деген баға берді.
Арнаулы қызметте көп жылдан бері қалыптасқан дәстүр бойынша жас қызметкерлерге табельдік қару тапсыру рәсімін ардагерлер атқарды. Жастар атынан ҚР ҰҚК академиясының үздік түлегі, лейтенант Жанарыс Мереке сөз алып, ардагерлердің қажырлы еңбектерін әрдайым үлгі тұтатындықтарын, қызметте қайсарлық пен қырағылық танытуға дайын екендіктерін жеткізді.
Мемориалдық кешеннің ашылуына жиналған ардагерлердің ұрпағы атынан Шәкірт Шаймұханұлы ізгі лебізін жеткізіп, әкелерінің есімі Ұлттық қауіпсіздік қызметкерлерінің жадында мәңгілік қалатынына шексіз ризашылығын білдірді. Есімдері тақтаға құрметпен жазылған 213 ардагердің де үрім-бұтағы үшін бұл күн қуанышқа толы болды.
Алма ЕСЕНБАЕВА