Оқи отырыңыз
Үлкеніміз өсіп, оны мектепке тасып жүргенде 45-ші «Арман» балабақшасы жақсы дегенді еститінмін. Кейін сәті түсіп, осы балабақшаға жақын жерге көшіп келдік. Сөйтіп, Әміріміз кезегі келгенде «Арман» балабақшасына барды. Арманым орындалып, қуанышымда шек болмады.
Айта кететін жайт, Әміріміз балабақшаға барғанға дейін «мама», «папа», «ата», «апа» дегеннен басқа сөз айтпайтын. Әйтсе де тәрбиешілеріміз Алиева Базаргүл Мыңбайқызы мен Сұлтанғазиева Мархабат Абсаматқызы «Қорықпаңыз, әлі-ақ сөйлеп кетеді», – деп баламызды құшақ жая қарсы алды.
Балабақшада білікті логопед маман Гүлмай Жұмаділова әр топтың тілі толық шыға қоймаған балаларымен жұмыс істейді екен. Әміріміз ол апайын да жақсы көріп, тапсырмаларын қуана орындап жүрді. Маманның еңбегі еш кетпей ақырындап сөйлей бастады. Әнұранды естіген сәтте ұшып тұрып, қолын жүрегіне қойып, қосылып айтатын болды. Көшеден Көк туымызды көре қалса да «Анау Қазақстан Республикасы» деп қуанады.
Ұлттық құндылық негізінде тәрбие беруді мақсат еткен балабақшада түрлі шаралар үнемі ұйымдастырылады. Барлық шара өте жоғары деңгейде өтеді. Оған балаларымыздың сүйікті апайлары Алиева Базаргүл Мыңбайқызы мен Аужанова Сая Бейжанқызы белсене атсалысады.
Әміріміз қазір демалыс күні: «Ертең апайға, балабақшаға барамыз», – деп дайындалып жүреді. Бауырсақ, кәмпит жеп жүрсе міндетті түрде бір-екеуін «Апайға апарамын» деп қойып қояды. Апайларының көмекшісі Орманова Айсәуле Төкенқызын да аузынан тастамайды. Ол да бар мейірімін төгіп тұрады.
Әмір биге де қатысады. Биден сабақ беретін Сая Бейжанқызы әр шарада аз дегенде 2-3 би ұйымдастырады. Оған балалар мәз, балаларға сахналық киім іздеп біз де мәзбіз.
Биыл балабақшаның түлегі атанатын Әміріміз қазірдің өзінде 50-60-қа дейін санай алады, барлық әріпті танып, жаза алады, екі-үш әріпті қосып оқи алады. Кеше ғана балабақшаға сөйлей алмай келген баламызды апайлары мектепке дап-дайын деп отыр.
Қазіргі таңда сол балабақшаға үшінші ұлымыз да барып жүр. Ол да балабақшаға бірден үйреніп кетті. «Апай жақсы», – деп Акимбекова Раушан Жұмагелдіқызына шаң жуытпайды.
Раушан апайымыздың да белсенділігі өте жоғары. Жақында ғана ұлттық құндылықтар тақырыбындағы шараны керемет өткізіп шықты.
Жалпы айтайын дегенім, ауласына кіргеннен бастап балабақшаның қаншалықты жайлы екені сезіледі. Апайлардың жүздері жылы, дәрігер ханым да кіріп-шығып жатқан барлық баланың атын атап, басынан сипап жатады. Мұндай жайлы жағдайдың орнауы, жұмыстың дұрыс жолға қойылуы, әрине, балабақша меңгерушісі Мамекова Ұлтуар Мухамерқызының еңбегі. Әдіскерлер Атманова Элмира Ықыласқызы мен Өмірбаева Арайлым Талғамбайқызының да үлестері аз емес. Соған орай жалпы балабақша ұжымына, балаларымыздың апайлары мен көмекшілеріне айтар алғысым шексіз. Денсаулықтары зор болсын, еңбектері еленіп, абыройлары асқақтай берсін дегім келеді.
Айнұр ӘБДІРАХЫМ,
№45 «Арман» балабақшасының ата-анасы
