Оқи отырыңыз
Бұл күнде 200 мыңға таяу тұрғындары бар Талғар ауданында жалпы білім беретін 43 мектеп жұмыс істейді. Өткен оқу жылын 40059 оқушы 67 пайыз білім сапасымен аяқтаған. Ауданға қарасты білім мекемелерінде 3829 ұстаз еңбек етті. Жылдан-жылға аудан мұғалімдерінің саны ғана емес, сапалық құрамы да өсуде.
Жас ұрпаққа білім мен тәрбие беруде алда тұрған басты міндеттерді айқындап, негізгі мәселелер жөнінде ой түйіндеп, пікір алысуды діттеген дәстүрлі тамыз кеңесі «Жаһандық құндылықтар және қазақстандық білім мен ғылымның сапасы» атты тақырыппен Тұздыбастау ауылдық Мәдениет үйінде өтті. Ауданның өнерпаз жеткіншектері ұстаздарына зор құрмет көрсетіп, өнерлерін тарту етті. Көтеріңкі көңіл-күй сыйлады.
Ұстаздар қауымын аудан әкімі Рыскелді Сатбаев құттықтап, жаңа оқу жылының басты жаңалықтарына тоқталды.
Осы жылы Дәулет ауылында 300 орынды мектептің құрылысы аяқталып, ауыл балдырғандары оқу жылын жаңа ғимаратта бастағалы отыр. Сонымен бірге, Талғар қаласында 1200 орынды, Қызылту, Жаңалық, Айғаным ауылдарында 300 орынды жаңа мектеп құрылысының жобалық-сметалық құжаты даярланып, 2020-2021 жылдарға жаңа мектеп салу жоспарланып отыр. Бұған қоса, Тұздыбастау, Алатау, Гүлдала, Бесағаш, Белбұлақ ауылдарынан мектеп салу жоспарда бар, – деді ол.
Тамыз кеңесінде Талғар аудандық білім бөлімінің басшысы Қарлыға Сәдуақасова баяндама жасап, ең өзекті мәселелерді атап өтті.
Өткен оқу жылында 3 мектепте оқушылар үш ауысымда оқыды. Ауданымызда оқушы саны жылдан-жылға артуда. Осыған байланысты биылғы қыркүйек айында үш ауысымды мектептер саны 3 мектепке артып, болжам бойынша 2019-2020 оқу жылында 5 мектеп балалары үш ауысымда оқытылады деп жоспарлануда, – деген Қарлыға Айсабекқызы алдағы жылыту маусымына дайындық жұмыстарының жоспарлы түрде жүзеге асып жатқанын баяндады.
Жаңа оқу жылына балаларды даярлау да өз деңгейінде жүзеге асқан. «Мектепке жол», «Жүректен жүрекке» атты қайырымдылық шаралары аясында 252 оқушыға мектеп формасы, спорттық киімдер мен оқу-құрал жабдықтары алынып берілген.
2009-2019 жылдарда білім мекемелеріне келген жас мамандардың 275-іне әлеуметтік қолдау қаржысы бөлініп, 82 жас маманға несие есебімен 2 млн. 268 мың теңгеден бастап 3 млн. 403 мың теңгеге дейін қаражат бөлінгендігі де тілге тиек болды.
Білім сапасы мұғалімдер қызметіне тікелей байланысты екендігін, сол себепті, ұстаздардың білімін жетілдіру мәселесінің ерекше назарға алынып, педагогтарға жаңа мақсат пен міндеттер жүктелгендігін айрықша атады.
Басты баяндамадан соң жарыссөзге шыққан Бірлік ауылындағы №35 мектеп-гимназияның директоры Айтжамал Нұрбатырова, «Ковчег» балалар үйінің директоры Марина Сугакова, «Күншуақ» бөбекжай бақшасының директоры Бекзат Қасымбекова, Гүлдала ауылындағы №21 орта мектептің директоры Қуан Айтбаев, басқа да ұстаздар сөз алып, өзіндік ой-пікірлерін ортаға салды.
Ұстаздар бас қосқан тамыз кеңесін қорытындылаған өңір басшысы Рыскелді Сатбаев жаңа оқу жылында білім сапасын арттырып, тәлім-тәрбие жұмысын жақсартуды міндеттеді.
Ұлбосын ИСАБЕК
