Алтай мен Атыраудың арасы, барлық қазақтың даласының тау-көлі күй шертіп, құстары сырнай тартып, қайың-бұталары би билеп тұрғандай. Қобыздың зарлы әуеніндей күңіренеді кейде. Мұның барлығы мұнтаздай тап-таза өнерді қазақ бойына сіңіріп, атадан балаға мирас етіп қалдырды. Осындайда сән-салтанаты жарасқан киелі мекенде туып-өскеніңді мақтан тұтып, Аллаға сансыз шүкір етесің.
Қасиетті қазақ өнерін, қазақ биін мұхиттың арғы жағы мен бергі бетіне танытып, паш етіп жүрген өнер ұжымының бірі және бірегейі – «Алтынай» мемлекеттік би ансамблі. Әйгілі өнер зерттеуші, тарихшы-этнограф Өзбекәлі Жәнібековтың ықпалымен өмірге келген өнер ұжымы бүгінде орда бұзар 30 жасқа толды. Қазір өнер ұжымы толағай табыстарға қол жеткізіп, әлем назарына ілігіп, қазақ биін биікке көтеріп келеді. Осынау қуаныштарымен бөліспек болған олар өнер жанашырлары мен қолдап, қошеметтейтін көрерменнің басын Ілияс Жансүгіров атындағы Мәдениет сарайындағы «Өнердің өрнегі – би» атты мерейтойда біріктірді. Тағатсыздана күткен кештің шымылдығын облыс әкімі Амандық БАТАЛОВ ашып, жүрекжарды құттықтау сөзін арнады:
– Құрметті өнерсүйер қауым, бүгін біз «Алтынай» мемлекеттік би ансамблінің құрылғанына 30 жыл толуына арналған мерекелік шараның кәусі болып отырмыз. Бәріңізге мерейтой құтты болсын, жұлдыздарыңыз жана берсін. «Өнерсіз ел өрге баспайды» демекші, тек қана биіктен көрініп, қазақтың биін үлкен дәрежеге жеткізе беріңіздер, – дей келе, бастапқыда фольклорлық-этнографиялық би ансамблі болып құрылып, мемлекеттік би ансамблі дәрежесіне көтерілуі мен облыс, республикада ғана емес, бүгінгі таңда әлемдік дәрежеде өнер көрсетіп жүрген ұжымның дамуына атсалысқан тұлғаларға алғысын жеткізді.
Әрмен қарай марапаттау рәсімі орын алып, ансамбльдің әрбір мүшесінің жүзі жадырап сала берді. Мәдениет және спорт министрлігі Қазақстан Республикасының Мәдениет саласының үздігі төсбелгісі «Алтынай» мемлекеттік би ансамблінің әртістері Алтынай Күрішбаева, Әсел Орынханова және Ершат Шоқанаевқа тағылды. Бұдан бөлек министрлік және облыс әкімі тарапынан Алғыс хат пен Құрмет грамотасы бірнеше өнерпазға табысталды. Қуанышты қуаныш еселей облыс әкімінің арнайы сыйлығы пәтер кілті Тоғжан Есенәлиева, Қасымхан Тілеубергенов және Талдықорған әуендері фольклорлық-этнографиялық ансамблінің көркемдік жетекшісі Гүлнар Оспановаға тарту етілді. Өнер ұжымы да қалыс қалмай, Амандық Ғаббасұлына бейне естелік сыйлады. Осы орайда көрерменнің ыстық ықыласы мен құрметі әрбір соғылған шапалақ үнімен көңілге қуаныш сыйлады.
Жиналған қауым көркіне көз тоймас қылықты қыздар мен бойынан қазақы ерік-жігердің лебі есер ұлықты ұлдардың өнерін тамашалады. Әрбір қимыл тарих қойнауынан орын тепкен салт-дәстүріміз бен ұлттық болмысымыздан хабар беріп, көңілімізді көкке өрлетіп, рухани ләззат сыйлады. «Алтынай» сынды ансамбль барда қазақ биі өлмейді, керісінше, қазыналы өнер өрлейді, асқақтайды.
Мәулен ӘНЕРБАЙ