Оқи отырыңыз
Әнші Димаш Құдайберген "Қазақстанның халық әртісі" атағын алатынын Президенттің өзінен естіген, деп хабарлайды 7-su.kz желілік басылымы.
Ол бұл туралы журналист Әділ Балтабаевқа берген сұхбатында айтты.
"Маған Қасым-Жомарт Кемелұлы бірінші рет оны ұшақта ұшып келе жатқанымызда айтқан. Оны айтуға бола ма екен? Президентіміз әуеде ұшып келе жатқанда маған осындай тамаша жаңалықты жеткізген болатын", - деді ол.
Димаш Құдайберген халықтың ықыласы, пейілі ешқандай марапатпен өлшенбейтінін айтты.
"Сол себепті бұл атаққа лайықпын ба, лайық емеспін бе, оны көзі қырағы халық шешеді. Менің әрбір аяқ алысым, әрбір жетіп жатқан жетістерім, әрбір марапатталып жатқан сәттерім көзі қырағы халықтың шешімімен болуы керек деп ойлаймын. Сол себепті мені осы уақытқа дейін әрбір аяқ алысымды қолдап келе жатқан тыңдарман қауымға басымды иіп, рақмет айтқым келеді", - деді әнші.
Айта кетейік, әнші Димаш Құдайберген биылғы мамырда Қытайдан Президент Қасым-Жомарт Тоқаевтың ұшағымен ұшып келген еді.
Фото: instagram.com/kudaibergenov.dimash
