Оқи отырыңыз
Салтанат сарайында облыс әкімі Бейбіт ИСАБАЕВ Қазақстан Республикасы Президентінің «Әділетті Қазақстан: Бәріміз және әрқайсымыз үшін. Қазір және әрдайым» атты сайлауалды бағдарламасын жүзеге асыру мақсатында облыстық құқық қорғау органдарының қызметкерлерімен кездесті. Жиынға барлық құқық қорғау органдарының басшылары, шегара қызметі мен әскери бөлімдердің және барлық деңгейдегі жергілікті атқарушы органдардың басшылары қатысты.
Басқосуда 6 мәселе қаралды. Атап айтсақ, облыста заңдылықты қамтамасыз ету, азаматтардың, заңды тұлғалардың құқықтарының қорғалуы, жемқорлыққа қарсы күрес, облыстық полиция департаментінің қылмыстың алдын алу бойынша іс-шаралары және материалдық-техникалық қамтамасыз етілуі, терроризмге (лаңкестікке), экстремизмге қарсы күрес және ішкі қоғамдық саяси тұрақтылық, шегарадағы сауда-экономикалық белсенділігі жағдайында шегара, кеден қызметінің жұмысы, шегара маңындағы аудандарда қауіпсіздікті күшейту мақсатында шегара әскери бөлімшелерінің инфрақұрылымдарын жақсарту, жергілікті атқарушы органдардың құқық қорғау органдарымен өзара үйлесімді іс-қимылының қамтамасыз етілуі кеңінен талқыланды.
Алғашқы мәселе бойынша облыс прокуроры Мадияр Басшыбаев баяндама жасап, облыста атқарылған жұмыстарды баяндады.
Бұл мәселе бойынша облыс әкімі сөз алып, «Талдықорған қаласындағы тұрмыстық қатты қалдықтар полигонының мәселесі сотқа дейін жеткізіліп, соттың шешімі сәуір айында шығарылды. Алайда сот орындаушылар асығар емес. Мәселені аяғына дейін жеткізуді тапсырамын. Өйткені тұрмыстық қалдықтар полигонының жұмыс жағдайы өте нашар, жаңа басқарушы компанияға тапсыруымыз керек. Шашылып жатқан полиэтилен пакеттері, т.б. халықтың орынды сыны мен наразылығын туғызып отыр», – деп Мадияр Басшыбаевтың назарын нақты мәселелерге аударды.
Жемқорлыққа қарсы күрес мәселесі бойынша атқарылған жұмыстарды Қазақстан Республикасы Сыбайлас жемқорлыққа қарсы іс-қимыл агенттігі Жетісу облысы бойынша департаментінің басшысы Мақсат Жебегенов баяндады.
Өз кезегінде сөз алған Жетісу облысы бойынша полиция департаментінің бастығы Атығай Арыстанов облыстық полиция департаментінің қылмыстың алдын алу бойынша іс-шаралары және материалдық-техникалық қамтамасыз етілуі тақырыбында баяндама жасады. Ол:
– Жалпы облыста 6 айдың ішінде 2148 қылмыс тіркелді. Оның ішінде ауыр қылмыс – 457, аса ауыр – 33. Кісі өлтіру, тонау, бұзақылық, мал ұрлығы азайды. Десе де пәтер ұрлығы азаятын емес. Домофон, камера жоқ үйлерге ұры көп түседі. Қылмыскерлердің 94 пайызы жұмыссыз. Сондықтан жалғыз полиция қызметкерлері ғана емес, жұмыла жұмыс істеуіміз керек. Ұрлықтың алдын алу мақсатында 2021-2023 жылдар аралығында мүлікті қорғау бағдарламасы бойынша полиция қызметкерлері көптеген жұмыс істеп жатыр, – деді.
Статистикалық мәліметке сәйкес, 2023 жылдың алты айының қорытындысы бойынша ауыр және аса ауыр қылмыстың ашылуы 2,4%-ға өскен. 2022 жылы мал ұрлығы бойынша 89 факті тіркеліп, осы жылы 67-ге азайғанымен қылмысты ашу өткен жылмен салыстырғанда 4,7 пайызға төмендеген. Бұл жөнінде облыс әкімі:
– Учаскелік инспекторларға тұрғын үйлермен біріктірілген полицейлік пункттер салынып, жағдай жасалуда, патрульдік полицейлерге заман талабына сай қажетті автокөліктер сатып алынуда, материалдық-техникалық базалар жаңартылып, нығайтылуда, осыған қарамастан қылмыстың өсуіне жол берілуде. Қылмыстың алдын алу бойынша нақты іс-шараларды көре алмай отырмыз. Жергілікті атқарушы органдармен өзара қарым-қатынас, нақты іс-қимыл пысықталмаған. Сондай-ақ, интернет алаяқтықпен күресу бойынша жұмыс тиісінше ұйымдастырылмаған. Бүгінгі күні 283 факті тіркелген, бұл өткен жылдан 54 пайызға артық, – дей келе барлық құқық қорғау саласындағы басшыларға ашық жұмыс істеуді, аудан, ауылдарды аралап, халықпен жиі кездесіп, БАҚ өкілдерімен тығыз қарым-қатынаста жұмыс істеу міндетін жүктеді.
Сондай-ақ, Президенттің тапсырмасын орындау мақсатында қоғамның тұрақтылығы мен қауіпсіздігіне нұқсан келтірмеу үшін қоғамдық қауіпсіздікті күшейтіп, интернет алаяқтықпен күресу, жол-патрульдік полиция қызметтерін күшейту, ұрлықтың санын азайтып, қылмыстың ашылу көрсеткішін жоғарылату бойынша бір ай мерзім ішінде нақты іс-шаралар жоспарын бекітіп, нәтижесін баяндауды тапсырды. Шара барысында аймақ басшысы бала тәрбиесіне де баса назар аудару керегін алға тартты.
«Мемлекет басшысы жуырда өткен Ұлттық құрылтайда жастарымыздың интернет дәуірінде өмір сүріп жатқанын және жас ұрпақтың әлеуметтік желі арқылы тәрбие алып отырғандығын, бұл – өте қауіпті үрдіс екендігін айтты. Сондықтан, облыс әкімінің орынбасары Рустам Әлиұлына, білім мен қоғамдық даму басқармасын, ата-аналар мен қоғамдық ұйымдарды, құқық қорғау органдары мен психологтарды біріктіре отырып, осы мәселенің шешімін табу мақсатында жаңа оқу жылына дейін қажетті іс-қимыл алгоритмін әзірлеп, тиісті деңгейде жұмысты ұйымдастыруды тапсырамын», – деді облыс әкімі.
Басқосуда ішкі қоғамдық саяси тұрақтылық, діни саладағы ахуал қалай бақылануда және бүгінгі күннің өзекті мәселесі – жас ұрпақтың өміріне қауіпті синтетикалық есірткіге қарсы күрестің қалай жүріп жатқаны жөнінде облыс әкімінің орынбары Рустам Әли толықтай тарқатты. Ол облыс бойынша нашақорлыққа және есірткі бизнесіне қарсы іс-қимылға бағытталған мемлекеттік органдардың қызметін үйлестіру жөніндегі өңірлік ведомствоаралық штаб құрылғанын және сол штабтың жұмысына көңілі толмайтынын айтты.
Ал ҚР Ұлттық қауіпсіздік комитеті шегара қызметі Жетісу облысы бойынша департаменті бастығының бірінші орынбасары Мұхтар Қанабеков сауда-экономикалық белсенділігі жағдайында шегара, кеден қызметінің жұмысы, шегара маңындағы аудандарда қауіпсіздікті күшейту мақсатында шегара, әскери бөлімшелердің инфрақұрылымдарын жақсарту бойынша атқарылып жатқан шаруаларға тоқталды.
Облыс әкімінің орынбасары Әлібек Жақанбаев жергілікті атқарушы органдардың құқық қорғау органдарымен өзара іс-қимылының қамтамасыз етілуі туралы баяндап, жер мәселесіндегі сыбайлас жемқорлықты тілге тиек етті.
Шара соңында Бейбіт Өксікбайұлы орынбасарлары мен құқық қорғау саласының басшыларына нақты міндеттер жүктеп, ашық әрі бірлесе жұмыс істеуді тапсырды.
Айдар ҚАЛИЕВ
Суретті түсірген Жеңіс ЫСҚАБАЙ
