Оқи отырыңыз
Әлемді жайлаған коронавирус індетіне байланысты екпе салдыру басталғанда әртүрлі алыпқашпа әңгімелер тарағаны белгілі. Бір білерім, вакцина адамдарды бұл аурудан қорғау үшін жасалғаны анық. Сондықтан, біз отбасымызбен екпе алдық.
Біз аудан орталығына жақын Қайназар ауылында тұрамыз. Отбасымызда күйеуім және үш балам бар. Балаларымыздың алды мектеп оқушысы, кішкентайымыз балабақшаға барады. Өзім Ұзынағаш ауылындағы жекеменшік балабақшалардың бірінде тәрбиеші болып жұмыс істеймін.
Екпені алғашқы болып елімізде білім беру саласының қызметкерлері, оның ішінде мұғалімдердің алғаны бекер емес. Себебі, белгілі – мектепте оқушылармен тікелей қарым-қатынаста жұмыс істейтіндіктен сақтық шараларын қатаң сақтаулары керек. Біз де балалармен жұмыс істейміз. Ұстаздар оқушылардың алдында сабақ берсе, біз ертеңнен кешке дейін балалармен біргеміз. Оның үстіне жұмысқа баруым үшін күнделікті таксимен жүруіме тура келеді.
Індеттің өршіп бара жатқанын күнделікті теледидардан көріп-біліп отырмын. Өзің сақтансаң ғана сақтайтыны туралы қағида бар ғой. Бұл да солай. Өзіміз барлық сақтық шараларын бұлжытпай орындап жүрсек қана аурудың бұдан әрі кең таралуына жол бермесіміз айдан анық. Аурудың алдын алатын сақтық шараларының бірі – екпе.
Сонымен, тәуекел етіп, тұрғылықты жерім бойынша медициналық мекемеге бардым. Екпе алуға келгенімді айттым. Әрі қарай медицина қызметкерлері бұл шараның барлық жөн-жосығын түсіндіріп, денсаулық жағдайымды тексеріп, вакцинаның алғашқы компонентін салды. Екпе қосынындағы арнайы бөлмеде дәрігердің қадағалауында біраз отырғаннан кейін үйге жіберді.
Алғашқы күндері суықтап қалғаннан пайда болатын кейбір жайсыздықтарды сездім. Бірақ ол ұзаққа созылған жоқ. Алғашқы дозаны жеңіл өткердім. Үш аптадан кейін дәл сол вакцинаның екінші компонентін салдырдым. Ол да ойдағыдай болды. Екпе алғанымды дұрыс қадам деп есептеймін. Алаңсыз жұмысымды атқарып жүрмін.
Күйеуім де екпе салдырды. Ол Алматы қаласына қатынап жұмыс істейді. Оның жұмысы да көпшілікпен тікелей қарым-қатынаста. Маған айналамдағы адамдардың, ең бірінші, отбасымның амандық-саулығы бәрінен қымбат. Адамның ауруға қарсы күресу қабілетін күшейтетін вакцинаны салдырудан қашпауымыз керек деп ойлаймын. Бұл әсіресе біз сияқты көпшілікпен тығыз қарым-қатынаста жұмыс істейтіндер үшін керек. Осылайша отағасы екеуміз ковидке қарсы вакцинаның екі компонентін де салдырдық.
Сымбат ТАЗАБЕКОВА,
Қайназар ауылы
Жамбыл ауданы
Алматы облысы
