Оқи отырыңыз
Төрткүл әлем көз тіккен «Токио – 2020» Олимпиадасының кезекті жарыс күні аяқталды. Бірақ екі күннің қорытындысы бойынша ел қоржынына жүлде түспеді. Бұл туралы "Жетісу" газетінің тілшісі хабарлады.
Қазақ боксы құлдырады ма? Екі күнде бес бірдей былғары қолғап шеберіміздің жарыс жолынан шығып қалғаны көңілге қаяу түсіретіні анық. Ел қоржынында үш қола болса да сары алтынның сыңғырын боксшылар естіртеді деп сарғая күткеніміз жасырын емес. Бірақ сенім артқан өрендеріміз білгенінен жаңылып, жүлдеден қағылды.
Төрт Олимпиада (2000 – Ермахан Ибраимов, 2004 – Бақтияр Артаев, 2008 – Бақыт Сәрсекбаев, 2012 – Серік Сәпиев, 2016 – Данияр Елеусінов) қатарынан 69 келі салмақта қазақ боксшылары қарсылас шақ келтірмей жеңістің желкенін көтеріп еді. Күрзі жұдырықты боксшыларымыз қарсыластарын қоғадай жапырған соң барша жұрт 69 келіні «қазақтың салмағы» деп атап кеткен болатын.
Өкінішке қарай, осы салмақта жұдырықтасқан Абылайхан Жүсіпов АҚШ спортшысы Деланте Джонсонға жол беріп, төрт Олимпиада қатарынан алтын алған «қазақ салмағының» үрдісін үзді. Ал Рио Олимпиадасының күміс жүлдегері, 91 келідегі қазақстандық Василий Левит бірінші кездесуінде-ақ Олимпиадамен қош айтысты. Жүлде алады деп үміт артқан Василий испаниялық Эммануэль Рейстен екінші раундта техникалық нокаутпен жеңілді. 57 келі салмақта өнер көрсеткен Серік Теміржанов та Токио төрінде сәтсіз өнер көрсетіп, жарыс жолынан шығып қалды. Жүлде алады деп сеніп отырған Бекзат Нұрдәулетовтің да бағы жанбады. 81 келіде өнер көрсеткен әлем чемпионы ресейлік Имам Хатаевқа есе жіберді.
Қыздар боксындағы жалғыз үмітіміз 75 келіге дейінгі салмақ дәрежесінде өнер көрсеткен Надежда Рябец еді. Бірақ қазақстандық былғары қолғап шебері бірінші айналымда әлем біріншілігінің қола жүлдегері канадалық Тарама Тибодан айласын асыра алмады. Қалған спортшыларымызға сәттілік тілейміз.
Біз үшін дзюдо да бір қоламен аяқталды. Жарыстың екінші күнінде-ақ қола жүлдеге қол салған Елдос Сметовтің жеңісті жолын ешкім жалғай алмады. Дидар Хамза 81 келіде монғол спортшысы Саид Моллайдан ұтылса, 90 келіге дейінгі салмақ дәрежесінде сынға түскен Ислам Бозбаевтың әзірбайжандық Мамадәлі Мехдиевке шамасы жетпеді.
Су спортының көрсеткішіне де көңіл толмай тұр. Қазақстан құрамасы су добынан қатарынан екінші кездесуінде жеңілді. Бірінші турда Хорватиядан 7:23, екінші кезеңде Сербиядан 5:19 есебімен ойсырай ұтылды.
2016 жылы Риода топ жарған Дмитрий Баландин Олимпиада ойындарының жартылай финалынан әрі аса алмады. Ол 200 метр қашықтыққа брасс әдісімен жүзіп, тұғырдың жетінші сатысына тұрақтады.
Таеквондодан жарыс жолына шыққан Жансель Дениз алғашқы айналымда өзбек спортшысы Светлана Осипованы жеңгенімен екінші кезеңде британиялық Бианка Уолкденнен ұтылды. Ерлер арасында 80 келідегі Руслан Жапаров та алғашқы жекпе-жегінде Александер Бачманды жеңіп, ширек финалда Корея спортшысына есе жіберді.
Мергендер мүлт кетті. Ерлер арасында садақ атудан сынға түскен Денис Ганькин де 1/16 финалда итальяндық Мауро Неспелидің мықтылығын мойындады.
Ерлер арасында жалғыз қалған қазақстандық теннисші Михаил Кукушкин де Олимпиадамен ерте қоштасты. Ол Беларусь спортшысы Илья Ивашкинмен кездесіп, 7:6, 3:6, 3:6 есебімен жеңілді.
Жалғыз қуанышты жаңалығымыз – қыздар арасында еліміздің бірінші ракеткасы Елена Рыбакина хорват Донна Векичті (7:6, 6:4), испаниялық Гарбине Мугурусаны (7:5, 6:1) жеңіп, жартылай финалға жолдама алды.
Айдар ҚАЛИЕВ
Алматы облысы
