Оқи отырыңыз
Қазақ үшін сәрсенбі ғана емес, бейсенбі де сәтті күн болып саналады бұдан кейін. Неге десеңіздер, Рио Олимпиадасында қазақтың ұлдары мен қыздары қоржынымызға алтын мен қола медаль салды. Ең бастысы, екеуі де тарихи медальдар болатын. Ең әуелі 69 келі салмақта біздің боксшылар командасының капитаны Данияр Елеусінов өзбек боксшысы Шахрам Диясовпен кездесті. Бұл кездесу кескілескен шайқас болды. Үш раундта да төрешілер қазақ боксшысының басым екенін анықтады. Оралдық ұлдың талай додада жерге қаратпаған боксшы, Әлем, Азия чемпионы деген атағы бар. Ендігі жетіспегені Олимпиада алтыны еді. Міне, сол армандаған күнге де жетіп, Алаштың байрағы көкте самғады. Дәл Даниярдың жеңісінен кейін залда отырған қазақ жанкүйерлерінің көзінен моншақтап аққан жасты көрдім. Сіздер де дәл сондай күйді кешкен боларсыздар. Бұл дегеніміз ұлтқа деген сүйіспеншілік, рухтың басымдығы. Жанұшырған жанкүйерлердің сезімін селге жібермей, одан ары аспанға асырған Даниярға қандай мақтау айтса да лайықты.
Әрине, өзбек боксшысын да осал деп айта алмаймыз. Өз ісінің шебері. Шаршы алаңда жан алып, жан берісті. Даниярдың маңдайына бір соққы жасаймын деп талпынғанын да көрдік. Бірақ ол арманы іске аспады. Біздің жігіт сауатты өнер көрсетіп, асқан шеберлікпен нағыз қазақтың қайсарлығын паш етті. Дәл осы жеңістен кейін әлемнің көптеген бокс мамандары біздің жанкүйерлер мен боксшыларды және мамандарды арнайы келіп құттықтады. Қазақтың қыран мінезді қайсар ұлына сүйсінді. Шын мықты екенін осы жігіттердің қолдауынан-ақ байқауға болады.
Кәсіпқой бокстың да майталмандары қасымызда отырған. Ол жігіттердің де бас бармақтарын шошайтқандарын көрдік. Мұны бокс өнеріндегі Даниярға ғана емес, күллі Қазақ жұртына берілген баға деп есептеймін. Осындай шаттықты күнді бізге тудырған Даниярды барлығымыз құшағымызға қысып, бетінен сүйдік. Дәл сол сәтте тұрып, бірауыз сауал тастауға да мүмкіндік туды. Ентігін баса алмай тұрған жаңа чемпион бар ынтасымен жауап та берді. Ендеше, бөркімізді аспанға атқан кездегі Даниярдың қуанышты сұхбатын назарларыңызға ұсынайын.
– Айналайын, алтын ұл. Сен күллі Алаштың рухын аспандаттың. Жеңісің құтты болсын! Әңгімені көңіл-күйіңнен басташы.
– Аға, шынымды айтсам, төбем көкке бір елі жетпей қалды. Мен осындай болып тұрғанда елдегі халықтың жайы айтпаса да түсінікті. Сондықтан көңіл деген шалқып тұр. Сіздердің, қазақ жұртының арқасы. Құттықтаулар мен қолдауларыңызға мың рахмет. Сенімдеріңізді ақтағаныма шын ризамын. Біздің жігіттер әлі талай Көк байрақты көтереді. Оны мен сеніммен айта аламын.
– Ал енді соңғы шайқасқа дейін жанымыз мұрнымыздың ұшында тұрды. Таңды атыра алмай, түнгі ұйқымыз бұзылып сені ойлаумен болдық. Сенің түнің қалай өтті?
– Мен, шынымды айтсам, ештеңе де ойламадым. Алаңсыз ұйықтадым, бар ауырлықты артқа тастап тынықтым. Физикалық және психологиялық тұрғыдан да демалыс алып, аттай жарап шықтым.
– Жеке бапкерің өзіңнің әкең. Әкелі-балалы жұп Олимп шыңын бағындырдыңдар. Әкенің көңілін түсінем. Десе де, қандай ақыл айтты?
– Осының барлығы әкем мен командадағы жігіттердің және Мырзағали ағамның жемісі. Жарыстан бір күн бұрын әкем ештеңе деген жоқ. Толық тынығуымды тапсырды. Ал ертесіне барлық ақылын төкті. Өзбек боксшысын сен ұтасың деп алмас қылыштай қайрап жіберді. Намыс қайрайтын ақылы мені жеңіске жетеледі.
– Әкең мен анаңның қазіргі қуанышын түсінем. Бірінші болып кім құттықтады?
– Әрине, әкем. Бала күнгі және жылдар бойғы арманы мен маңдай тері ақталды. Оған екеуміз бірге жеттік. Сондықтан әкеме үлкен алғысымды айтамын. Ауылдан Олимп шыңына дейін сан түрлі қиыншылықты басынан өткеріп, барлық тосқауылды бұзып өтті. Әр қарсыласты, кез келген жарысты бір тосқауыл десек, сол кедергілерден жемісті өте білдік. Ал анаммен телефон арқылы сөйлестік. Жеңісіме қатты қуанып, жанарындағы жасын да жасыра алмады. Мен де өз тарапымнан рахметімді айтып, ұлының жеңісімен құттықтадым.
– Сен чемпион болғаннан кейін барлық БАҚ өкілдерінің жүректері қуаныштан жарылып кете жаздады. Әлеуметтік желі тіптен бөлек. Оқи алдың ба құттықтауларын?!
– Расында да жан-жақтан құттықтаулар түсіп жатыр. Барлығын жүрегімнің түбіне терең бойлатып, ыстық ықыласпен қабылдап жатырмын. Рахметімді айтамын!
– Рионы бағындырдың. Токионың жайын ойлайсың ба?
– Аға, шынымды айтсам, оны әлі жоспарлап та, ойға алып та үлгерген жоқпын. Алдағы уақыт шешеді. Қазіргі менің мақсатым – алған алтынымды еліме жеткізіп, күтіп отырған Қазақ жұртымен қауыштыру. Сағынышы мен толқынысын басу. Содан кейінгісін көре жатармыз.
Ыстығы басылмаған су жаңа чемпионның жауабына разы болып, тағы да маңдайынан иіскеп, арқасынан қақтым. Осылайша алтын арқалаған Қазақ жанкүйерлері Олимпиада қалашығына «Алтын күн аспанын» шырқап, шат көңілмен келіп жетті.
Несіп Жүнісбайұлы, белгілі спорт журналисі, Алматы облысының Құрметті азаматы, арнайы «Жетісу» газеті үшін Рио Олимпиадасынан.
