Жетісу өңірінде жылыту маусымына орай үй секторындағы қауіпсіздік шаралары қатаң бақылауға алынып, тұрмыстық газ бен пештерді дұрыс пайдалану талаптары түсіндірілуде. Бұл туралы ТЖД Мемлекеттік өрт бақылау басқармасының бас инженері Жан Орысбай баспасөз мәслихатында айтты.
Аймақтағы төтенше жағдайлар департаменті өкілінің айтуынша, жыл сайын ауа райының суытуына байланысты тұрғындар газ қазандықтары мен пештерді жиі қолдана бастайды. Алайда немқұрайлылық пен қарапайым қауіпсіздік ережелерін сақтамау қайғылы жағдайға әкеледі. Тұрмыстық газды үнемдеу немесе бөлмені лезде жылыту мақсатында газ плиталарын қолдану, сондай-ақ мұржаларды уақытында тазаламау үлкен қатер төндіреді.
Тұрмыстық газ бен пешті қауіпсіз пайдалану барысында басты үш талапты қатаң сақтау қажет. Біріншіден, газ жабдықтары тек жарамды күйде болып, оларды орнату мен жөндеуді тек білікті мамандар атқаруы тиіс. Екіншіден, желдету жүйесі мен түтін мұржасының жағдайы үнемі бақылауда болуы шарт. Үшіншіден, газ плитасын бөлмені жылыту үшін пайдалануға қатаң тыйым салынады. Сонымен қатар улы газдың иіссіз де түссіз екенін ескерсек, оның қаупін ерте анықтау үшін арнайы датчиктердің маңызы өте зор. Биыл әлеуметтік осал топтағы отбасылардың үйлеріне 5 млн 511 200 теңге сомасына 1736 датчик алынып, оның 654-і орнатылды, – дейді маман.
Осындай қауіпсіздік құрылғыларының пайдасы туралы Сарқан ауданындағы оқиға дәлел бола алады. 2026 жылдың 18 тамыз күні түнде жеке тұрғын үйде қаңқалы қабырғаның бықсуы орын алған. Үй иелері ұйықтап жатқан кезде түтінді анықтайтын датчик іске қосылып, тұрғындарды оятқан.
Мамандар профилактикалық жұмыстардың ауқымы кең екенін атап өтуде. ТЖД, полиция департаменті, жергілікті атқарушы органдар мен волонтерлар бірлесіп, облыс аумағындағы 6937 әлеуметтік осал топтағы отбасылардың жеке тұрғын үйлерін толық аралап шықты. Оның ішінде 2681 көпбалалы отбасы, 1450 аз қамтылған, 1763 мүгедек және 1043 жалғызбасты зейнеткерлер есепке алынған. Халықты ақпараттандыру мақсатында әлеуметтік желілерде 2932 бейнеролик пен мақала жарияланып, дауыс ұлғайтқыш құрылғылары арқылы түсіндіру шаралары жүргізілді.
Қысқы маусымда қауіпсіздікті қамтамасыз ету әр азаматтың өзіне және жақындарына деген жауапкершілігінен басталады. Ақаулы пештерді уақытында жөндеп, балаларды қараусыз қалдырмау арқылы түрлі қайғылы жағдайлардың алдын алуға толық мүмкіндік бар.
Өртті сөндіргеннен гөрі оның алдын алу әлдеқайда оңай. Тұрғындар қауіпсіздік ережелеріне формальды түрде қарамауы тиіс. Ақаулы жабдықты жөндеуді кейінге қалдырмай, әрбір жылыту кезеңін төтенше жағдайларсыз өткізу – ортақ мақсатымыз, – дейді спикер.
Мақпал Әділханқызы
