Тәуелсіздігіміздің тұғырын нықтап, шегарамызды шегендеп, ана тілімізді елжандылық, отансүйгіштік сезімнің ең биік шыңы деп санағалы өркениет көшінен өзіндік орын сайладық. Іргелі елдердің, дамыған мемлекеттердің басшылары Сарыарқа төсіндегі саф алтындай сәуле шашқан Астанамызға табан тіреп, келелі кеңес құратын күнге жеттік. Әлемдік мәселелердің шешім тапқан, келелі дүниелердің өріс алған құтты ордасына, бейбітшілік пен берекенің бесігіне айналған сол әз Астанамызға биыл 25 жыл толып отыр.
Мыңжылдық жылнамамыздағы тарихи деректерге көз салсақ, қазақ халқының дәуірлер мен ғасырлардағы әрбір астанасы елдің жүрегі болып, рух пен ұжданның, дәстүр мен құндылықтың ұясына айналған. Бүгінде ширек ғасыр тарих түзген Астанамыз да әлем халықтарының көз суарған, көзайым болған киелі ордасына айналды. Ал бұл қазақ халқының ұлы мақтанышы, қастерлі қара шаңырағы саналатыны да сөзсіз. Міне, осындай тебіреніске тақырып толған Астананың 25 жылдығын жетісулықтар да айрықша атап өтті.
Талдықорған қаласындағы «Жастар» мәдениет және демалыс саябағында өрнек тапқан «Жайнай бер, жарқырай бер – Астана!» атты салтанатты шараға жиналған көпшілік қарасы қалың болды.
Жиын барысында алғашқы болып сөз алған Талдықорған қаласының әкімі Ернат Бәзіл көпшілікті ұлттың ұстыны болған, келешекке кемел көш түзеген жақұт қала күнімен құттықтады. Мәдениет пен өнердің, спорттың бесігіне айналып келе жатқан бағаналы орда ұлтқа ортақ мақтаныш екенін айшықтады. Ел мерекесі, ұлт мерейі, ұлттық идеяларды іске асырудың орталығына айналған Астананың 25 жылдығына орай облыста, Талдықорғанда өрнек тапқан қуаныштарды да атап өтті.
Салтанатты шара соңында күмбірлеген күй шанақтан төгіліп, әуелеген асқақ әндер айтылды. Облыстық филармонияның, «Талдықорған әуендері» халықтық, фольклорлық-этнографиялық ән-би ансамблінің өнерпаздары мерекелік концерт ұсынды.
Асыл СҰЛТАНҒАЗЫ
