Абай Құнанбайұлының 175 жылдығына орай «Құлақтан кіріп, бойды алар, әсем ән мен тәтті күй» атты халықаралық ән-жыр байқауына Жамбыл ауданынан қатысқан сегіз жасар Дарина Әлібекова жүлдегер атанды.
Балалар мен жасөспірімдер арасындағы байқау Білім және ғылым министрлігінің ұйымдастыруымен Алматы қаласында өткен болатын. Дарина ұлы ақынның «Жүрегім, нені сезесің?» өлеңін және бірінші қарасөзін мәнерлеп оқып, көркемсөз номинациясы бойынша 1-орынға ие болды.
Қазылар алқасынан жоғары баға алған өнерлі өрен Қарғалы ауылындағы дарынды балаларға арналған, үш тілде оқытатын №2 арнаулы гимназиясының 3 «б» сыныбының үздік оқушысы. Ол мұның алдында мектепте өткен аймақтық Абай оқуларында топ жарған еді. Мұндай жетістікке жетуі, біріншіден, сынып жетекшісі Жансая Сұбханбердиеваның ұстаздық еңбегі десек, екіншіден, бүлдіршіннің отбасында алған тәлім-тәрбиесінің жемісі болса керек.
Дарина ардагер журналист, Мәдениет қайраткері, Алматы облысының, Талдықорған қаласының, Жамбыл ауданының Құрметті азаматы, қарымды қаламгер Күмісжан Байжанның немересі. Оның ана тілге деген махаббатының кішкентайынан оянуына атасы мен апасының әсер еткені анық. Қос еңбек ардагері бүгінде қолындағы балдай тәтті немереге мейіріммен бірге ұлттық құндылықтар дәнін сіңіруде.
Апасы сөз өнерінің шебері болса, атасы Саламат Берекетұлының бойында суретшілік дарын бар. Кішкентай қыздың тілге, сурет өнеріне қызығушылығы байқалады. Атасы немересін сабаққа аудан орталығынан Қарғалы ауылына өзі апарады.
Серік САТЫБАЛДИЕВ
