Көксу ауданына қарасты Амангелді ауылындағы орта мектепке Социалистік Еңбек Ері Зылиха Тамшыбайдың есімі берілді. Салтанатты шараға Көксу ауданының әкімі Әділ Алмас қатысып, тақтаны өзі ашты.
Өз сөзін аудан әкімі: «Бүгін ауыл тұрғындары үшін есте қалатын күн. Ақын Ілияс Жансүгіров «Өз елі өз ерлерін ескермесе, ел тегі қайдан алар кемеңгерді?» дегендей, біз өз ұлыларымызбен мақтанамыз, марқаямыз, есте сақтаймыз. Осыдан жеті жыл бұрын Зылиха апамызды келмеске шығарып салғанда, осы жерде қаралы, азалы үн естіліп еді. 74 жыл ғұмыр кешкен апамыз талайға үлгі болды, бастау бұлақтардың көзін ашты. Бүгін ауылдың негізгі білім ұясына апамыздың есімін беріп отырмыз. Мен қуаныштымын. Жақында Амангелді ауылына Зылиха апамыздың есімін беру туралы ұсыныс жасадық, бүгінде қаралып жатыр. Нәтижесі жақсы болады деген ойдамын», – деп түйіндеді.
Одан кейін көз көргендер сөз алып, Зылиха апамыздың ерлігін, ерекшелігін, ізденімпаздығын, шеберлігі мен іскерлігін айтып, әдемі естеліктерімен бөлісті. Арнайы келген Зылиха апамыздың күйеу баласы Серік Әбдірахманов ауыл тұрғындарына рахметін айтып, мектеп ұжымына жаңа оқу жылында сәттілік тіледі.
Қазақстан Республикасы Үкіметінің 2017 жылғы 22 маусымдағы №389 қаулысы бойынша «Амангелді атындағы мектеп «Көксу ауданының білім бөлімі» мемлекеттік мекемесінің «Мектеп жанындағы шағын орталығы бар Зылиха Тамшыбай атындағы орта мектебі» коммуналдық мемлекеттік мекемесі болып аталды. Бұл қаулыға Қазақстан Республикасының Премьер-Министрі Бақытжан Сағынтаев қол қойды.
Бұл мектеп 1920 жылы сол кездегі Қаратал ауданы бойынша Нүрке атындағы жалғыз бастауыш мектеп болып ашылды. Ал мектепке Амангелді есімі 1960 жылы сегізжылдық мектептен орта мектепке көшкенде берілді. Мектеп 1999 жылы күрделі жөндеуден өтті. Биыл Зылиха Тамшыбай атындағы орта мектептің табалдырығын аттаған 1-сынып бүлдіршіндерінің саны – 37. Ал мектепті бітіретін түлектер саны – 24. Жалпы Көксу ауданында биыл 1-сыныпқа 810, 11-сыныпқа 474 оқушы барды. Былтыр аудан бойынша «Алтын белгіге» бітірген түлектер саны 22 болса, соның біреуін баптаған дәл осы Амангелдіде орналасқан орта мектеп.
Жаңа оқу жылында Зылиха Тамшыбай атындағы орта мектептің ұстаздары мен білімгерлеріне тек қана сәттілік тілейміз!
Серік ҚАНТАЙ.
