Астанада өткен ІІ Халықаралық психологтар форумында Оқу-ағарту вице-министрі Еділ Оспан елімізде мектеп психологтарының рөлі артып келе жатқанын атап өтті, деп хабарлайды 7-su:kz ақпараттық порталы.
Оның айтуынша, қазіргі жастар күрделі технологиялық әрі әлеуметтік өзгерістердің дәуірінде өмір сүріп жатыр. Бұл балалардың психологиялық күйіне де әсер етпей қоймайды. Осыған байланысты, балалармен жұмыс істейтін кәсіби психологтарға деген қажеттілік күрт өскен.
Қазақстанда балаларға психологиялық қолдау көрсететін мамандардың қатары артып келеді. Қазіргі таңда білім беру ұйымдарында еңбек ететін психологтардың біліктілігі де жоғарылап отыр. Ел бойынша 700-ден астам маман өңірлік психологиялық қолдау орталықтарында жұмыс істеуде, — деді вице-министр.
Еділ Оспанның айтуынша, Үкімет те бұл бастаманы қолдап отыр. Биылдан бастап барлық өңірде 500 оқушыға 1 психолог есебімен маман енгізу жұмыстары жүргізілуде. Бұл көрсеткіш көптеген мектептерде жүзеге асырылып қойған. Бүгінде ел мектептері 10 мыңнан астам педагог-психологпен қамтылған.
Бұрын психологтар мектептегі жалпы ахуал мен балалардың психологиялық климатына жауапты болса, қазір әр оқушының жеке ерекшелігіне мән беріп, нақты бағытталған көмек көрсетуге тырысуда. Осы мақсатта педагогтарға арнайы диагностикалық құралдар берілді. Бұл құралдарды Оқу-ағарту министрлігі жанындағы «Өркен» институты әзірледі. Олар балалардың мінез-құлқына кері әсер етпейтін, қауіпсіз әдістемелер болып табылады, — деп түсіндірді вице-министр.
Аталған форум «Балалар мен жастардың қабілеттерін, дарындылығын диагностикалау мен дамытудағы өзекті мәселелер» тақырыбы аясында ұйымдастырылды.
Іс-шараны El Umiti Корпоративтік қоры Оқу-ағарту министрлігінің қолдауымен өткізіп отыр. Форум кәсіби тәжірибе алмасу алаңына айналып, Қазақстан, Еуропа және Азия елдерінен келген сарапшылар, педагогтер, психологтар мен ата-аналарды бір арнада тоғыстырды.
