«Азаматтарға арналған үкімет» Мемлекеттік корпорациясы жүргізуші куәлігін алу процесін жеңілдететін жаңа жаңашылдықты енгізді. Енді 073/е үлгісіндегі медициналық анықтама Халыққа қызмет көрсету орталықтарының (ХҚКО) ақпараттық жүйесіне автоматты түрде түседі.
Мұндай мүмкіндік ҚР Денсаулық сақтау министрлігінің ақпараттық жүйесі мен ХҚКО жүйесін біріктіру арқылы жүзеге асты. Бұл азаматтардан жалған медициналық анықтама талап ету немесе ұсыну жағдайларын болдырмай, рәсімнің ашықтығын арттырады.
Енді жүргізуші куәлігін алу үшін медициналық анықтаманы қағаз түрінде алып келудің қажеті жоқ – барлық мәліметтер цифрлы түрде тексеріледі. Бұл жаңашылдық:
-
Өтініштерді қарау мерзімін қысқартуға,
-
Жалған құжаттарды болдырмауға,
-
Қызмет көрсету сапасын арттыруға мүмкіндік береді.
Айта кету керек, егер жүргізуші куәлігін оның жарамдылық мерзімі аяқталмай тұрып ауыстырсаңыз, медициналық тексеруден өтудің немесе психоневрологиялық және наркологиялық диспансерлерден анықтама алудың қажеті жоқ.
Бұл бастама мемлекеттік қызметтерді цифрландыру аясындағы маңызды қадам болып табылады және мемлекеттік органдар арасындағы өзара әрекеттестікті оңтайландыруға бағытталған.
«Азаматтарға арналған үкімет» мемлекеттік корпорациясы КЕАҚ
