Аталған шарада Талдықорған қаласының әкімі Ернат Бәзіл жиналған қауымды мерейлі мерекемен құттықтап, ізгі тілегін жеткізді.
– Сабантой – халықтар достығын, бірлікті, әдеп-ғұрыпты дәріптейтін маңызды мереке. Ол, еңбек пен ынтымақтың, дәстүр мен достықтың жарқын үлгісі. Бұл татар халқында сақталған салт-дәстүр бойынша елге, жерге мол ырыздық тілеп, жиын-терім көп болсын деген ырыммен тойланатын мейрам. Содықтан да биылғы жыл халқымыз үшін ырысты да табысты болсын деп тілейміз,– деді шаһар басшысы.
Шара барысында өңір өнерпаздары әуезді әндер шырқан, мың бұралған бимен көрерменге көтеріңкі көңіл күй сыйлады. Сонымен қатар алаңда татар халқының ұлттық тағамдары мен қолөнер бұйымдары көрмеге қойылып жұрт назарына ұсынылса, ұлттық спорттық түрлерінен арнайы сайыстар ұйымдастырылды. Мерекелік бағдарламаны Жетісу облысының тұрғындарымен қатар Татарстан Республикасынан арнайы келген мәртебелі меймандар тамашалап, өз ризашылықтарын білдіріп қайтты.
Нақты дерек көздеріне жүгінсек, Сабантой мерекесі — түбі бір түркі халықтарының арасында татар, башқұрт ұлттары дәстүлі түрде кеңінен тойлайтын мейрам. Негізі бұл мереке күзгі егін жинау науқанынан кейін өткізілетін. Заман ағымына сай 20 ғасырдың 90-жылдарынан бастап Татарстан Республикасында әр жылы маусым айында мемлекеттік деңгейде аталып өтілетін болған. Мұнда сәнді ұлттық киген жастар би билеп, өз ана тілінде әсем әндер шырқап, қызықты қойылымдар көрсетсе, аналар қауымы түрлі тағамдар әзірлеп, ұмытылып бара жатқан ұлт дәстүрін қайта жаңғыртады. Сондай-ақ, ат жарысы, күрес, жаяу жүгіру сынды спорттан түрлі жарыстар ұйымдастырылады.
Айдын КӘЛІМХАН
