Атап айтқанда, вокзал маңы толықтай қоршалып, көліктерге тек бір бағытпен кіруге рұқсат етілген. Бұл жағдай бұрын екі бағыт арқылы кедергісіз кіріп жүрген кәсіпкерлер үшін қиындық туғызды. Сонымен қатар вокзал жанындағы алаңда орналасқан мейрамхана, көкөніс түрлерін сататын сауда орны және дәмхана иелері жүк көліктерінің аумаққа кіруінде қиындықтар пайда болғанын хабарлады.
Кәсіпкерлер аудандық кәсіпкерлер палатасына жүгініп, мәселенің мән-жайын жеткізді. Палата бұл өтінішті назарға алып, шұғыл түрде аудан әкімдігі, прокуратура, полиция бөлімшесі, вокзал әкімшілігі және жөндеу жұмыстарына жауапты мердігер мекемемен келіссөз жүргізді.
Атқарушы органдар мен жауапты ұйымдардың жедел әрекетінің нәтижесінде «қозғалысқа тыйым салынған» жол белгісі алынып тасталды. Қоршаулар шегеріліп, жүк көліктері үшін ыңғайлы кіру жолы қамтамасыз етілді. Қазіргі таңда кәсіпкерлер вокзал аумағына еркін кіріп-шыға алады. Бұл шешім бизнестің үздіксіз жұмыс істеуіне мүмкіндік беріп қана қоймай, мемлекеттік органдар мен кәсіпкерлер арасындағы өзара тиімді іс-қимылдың нақты дәлелі болды.
Аудандық кәсіпкерлер палатасы кәсіпкерлердің заңды мүдделерін қорғауға және қолайлы бизнес-орта қалыптастыруға бағытталған қолдау үшін аудан әкімдігі мен прокуратурасына, полиция бөліміне және атсалысқан барлық тарапқа алғыс білдірді.
А. ЫБЫРАЙ
Қаратал ауданы
