Ұйымдастырушылардың айтуынша, бұл жолғы турнирге Талдықорған қаласындағы әр саладағы қызметші ересектерден құралған 18 әуесқой команда қатысқан. Олар екі топқа бөлініп, өзара бақ сынаған. Көрермен қауымдың делебесін қоздырып аса тартымды да тартысты өткен сайыс нәтижесі бойынша төрт команда үздік деп танылған. Олар «Zhetisy Champions», «Гор Акимат», «Талдықорған Жарнама» және «Erkin» командалары. Жеңімаздар жартылай финалға жолдама алған.
Сонымен жартылай финалдық кезеңдегі нағыз тартысты жарыс «Zhetisy Champions» пен «Гор Акимат» командалары арасында болды. Алғашқы сәтте қос команда 2:2 есебімен тең түссе, жарыстың шешуші нәтижесінде «Zhetisy Champions» командасы 6:5 есебімен қарсыласынан басым түсіп, финалдық бәсекеге жолдама алды. Әуесқой командалар арасында өтіп жатқан бұл реткі қала чемпионаты шілде айының соңында аяқталмақ.
– Спорт денсаулық кепілі. Осыған сай қала мекемелеріндегі ересек қызметшілер арасында өткен бұл жарыс жалпы жұртқа салауатты өмір салтын ұстануды дәріптеп, бұқаралық спортты дамытуға бағытталған. Атап өтсек, бүгінде қаламызда көптеген спорттық нысандар жұмыс жасауда. Онда спортты жанына серік еткен әр азамат спорттың кез келген түрімен жаттығуына болады. Сонымен қатар қазір шаһарда жаттығу және аулаларда спорттық алаңдар көптеп салынуда. Осының барлығы спорт сүйер қауымға үлкен қолдау,– дейді Талдықорған қалалық спорт бөлімі басшысы Жаннұр Әбішев.
Айдын КӘЛІМХАН
