Қазақстанда банк картасы мен деректерін үшінші тұлғаларға бергені үшін қылмыстық жауапкершілік енгізілді, – деп хабарлайды 7-su.kz ақпараттық порталы.
ҚР Қылмыстық кодексіне жаңадан енгізілген 232-1-бапқа сәйкес, азаматтардың банк картасы мен шот деректерін басқа адамдарға беруі немесе сыйақы алу мақсатында үшінші тұлғаның мүддесіне төлемдер мен ақша аударымдарын жасауы – қылмыс болып саналады.
Ішкі істер министрлігінің мәліметінше, алаяқтар осындай деректерді көбінесе қылмыстық жолмен келген ақшаны заңдастыру немесе басқа азаматтарды алдау үшін пайдаланады.
– Көп жағдайда азаматтар өздерінің қылмысқа қатысушы екенін білмейді. Жеке және банк деректері – жай ғана ақпарат емес. Бұл – сіздің мүлкіңізге, қауіпсіздігіңізге және заң алдындағы жауапкершілігіңізге тікелей әсер ететін мәлімет, – деді ІІМ өкілдері.
Министрлік мынадай сақтық шараларын ұсынады:
-
ешқашан банк деректеріңізді үшінші тұлғаларға бермеңіз;
-
картаңызды немесе шотыңызды беру арқылы «оңай ақша табуға» келіспеңіз;
-
күмәнді жағдай туындаса, дереу банкке немесе құқық қорғау органдарына жүгініңіз.
ІІМ азаматтарды қырағы болуға шақырып, қаржы деректерін қорғаудың маңыздылығын ескертеді.
