Орталық 1,5 жастан 18 жасқа дейінгі мүгедектігі бар 125 балаға жартылай стационар жағдайында арнаулы әлеуметтік қызмет көрсетіп келеді. Ата- аналар мен мамандар тарапынан көрсетілетін қызметтерге сұраныстың артуына байланысты орталық аясын кеңейту қажеттілігі туындап, жаңа бөлімше ашу туралы шешім қабылданған еді. Жаңа бөлімше АВА терапиясы әдісімен жұмыс істейді. «Болашақ» қайырымдылық қорының облыстағы кураторы Мәдина Манасқызының айтуынша, стационарда мамандар балалардың мінез-құлқын сараптап, қалыптастырумен айналысады.
Ашылған бөлімше 40 балаға арналған. Жалпы аумағы 580 шаршы метрді құрайтын кең әрі жарық. Аралап көргенімізде мамандардың әр баламен жеке, тиянақты жұмыс істеп жатқанына куә болдық. Мұнда балалар жасына, даму ерекшеліктері мен диагнозына сәйкес екі топқа бөлінеді. Жаңа бөлімшеде 8 түрлі арнаулы әлеуметтік қызмет көрсетіледі. Олар: әлеуметтік-құқықтық, еңбек, мәдени, экономикалық, педагогикалық, тұрмыстық, медициналық, психологиялық шаралар. Бұл қызметтер балалардың әлеуетін ашуға, өз-өзіне қызмет көрсету дағдыларын қалыптастыруға, мінез-құлық және қарым-қатынас қабілеттерін жетілдіруге бағытталады. Орталықтың ашылуына арнайы барған облыстық жұмыспен қамтуды үйлестіру және әлеуметтік бағдарламалар басқарма басшысының орынбасары Сәния Наурызбаева өңірде аутизм диагнозымен 463 бала тіркелгенін тілге тиек етті. Жалпы облыста денсаулығында кінәраты бар балаларға арналған 7 орталық ашылған. Аталмыш орталықтың бас корпусы осыдан 3 жыл бұрын пайдалануға берілген. Содан бері оң нәтиженің арқасында 5 бала жалпы білім беретін мектепке, биыл бір бала балабақшаға ауысты. Аңсар атты 7 жасар баланың анасы Назгүл Серікова сөйлей алмай келген баласының бүгінде жалпы білім беретін мектепке барғанын айтып, қуанышымен бөлісті.
– Келгенде атын айтып шақырсақ қарамайтын баламыз жазу-сызу үйреніп мектепке барды. Қазір әр нәрсені үйренуге, білуге құлшынысы артты. Толыққанды жазылсын деп әлі де сабақтан бос уақытында мамандарға әкелеміз, – деп ризашылығын білдірді. Бұл орталық мамандарының табанды еңбегінің жемісі.
Бөлімшенің басты мақса- ты – аутизм спектрінің бұзылыстары бар балалар мен олардың отбасыларына жан-жақты және уақытылы қолдау көрсету. Орталық ұжымы әрбір балаға ерекше мейіріммен қарап, оның қоғамға бейімделуіне ықпал етуді басты міндет санайды. Өңірде ерекше балаларға деген қамқорлық өте жоғары деңгейде. Бұл – әлеуметтік қызмет көрсету ғана емес, үлкен жүректен туған шынайы мейірімділік пен жауапкершіліктің үлгісі.
Гүлжан ТҰРСЫН
