Жетісу облысының Панфилов ауданында мүлікті қасақана жою фактісі бойынша қозғалған резонанстық іс бойынша сот үкімі шықты, – деп хабарлайды Polisia.kz.
Сот 25 жастағы ер азаматты Жаркент қаласындағы ойын-сауық орталығы ғимаратын әдейі өртегені үшін кінәлі деп танып, оны сегіз жылға бас бостандығынан айырды. Оқиға салдарынан келтірілген материалдық шығын 81 миллион теңгеден асты.
Тергеу материалдарына сәйкес, түнгі уақытта айыпталушы компьютерлік клубтардың бірінде клуб оператормен бірге алкогольдік ішімдік ішкен. Мас күйінде екеуінің арасында жанжал туындап, күдікті мүлікті сындырып, жабдықтарды бүлдірген. Кейін ол ғимаратқа өрт қойған. Оқиға орнынан кетіп қалғанымен, жалын ойын-сауық орталығының негізгі бөлігіне және техникалық жабдықтарға айтарлықтай зиян келтірді.
Сот істің барлық мән-жайын ескере отырып, айыпталушыға ҚАЖ мекемесінде өтеу үшін сегіз жыл жаза тағайындады және келтірілген шығынды өндіру міндетін жүктеді.
Бұл оқиға – ашуға берілудің ауыр салдары мен жауапкершілігін еске салатын елеулі жағдай.
