Ескелді ауданына қарасты Жалғызағаш ауылындағы №109 сайлау учаскесінде Қазақстан Республикасының Конституциясына өзгерістер енгізу жөніндегі референдумда Бектеновтер отбасы өз таңдауларын жасады. Бұл әулет – «Мерейлі отбасы – 2025» байқауының облыстық кезеңінің жеңімпаздары.
Сайлау учаскесіне үлкен әулеттің мүшелері бірге келді. Он шақты адам бір мезетте дауыс беріп, азаматтық белсенділіктерін және ел болашағына бейжай қарамайтындықтарын көрсетті.
Отбасы мүшелерінің айтуынша, референдумға қатысу – әр азаматтың құқығы ғана емес, қоғам мен болашақ ұрпақ алдындағы үлкен жауапкершілік.
– Біз әрдайым қоғамдық өмірге белсенді араласуға тырысамыз. Отбасымыз үшін елдің болашағына бейжай қарамау, жастарға үлгі болу маңызды, – дейді Бектеновтер.
Ауыл тұрғындарының айтуынша, бұл отбасы жерлестері арасында үлкен құрметке ие. Олар қоғамдық жұмыстарға белсене қатысып, ауыл өміріне үнемі үлес қосып келеді. Бектеновтер әулетінің референдумға қатысуы – отбасылық құндылықтар мен азаматтық жауапкершіліктің өзара тығыз байланысты екенін тағы бір мәрте айқындай түсті.
Отбасының ерекше мақтанышы – ұлдары, жас шабандоз Хамза Бектенов. Ол үш жасында алғаш рет атқа мініп, бес жасынан бастап бәйгелерге қатыса бастаған. Он жасына дейін жас спортшы республикалық және халықаралық жарыстарда топ жарып, бірнеше мәрте жеңімпаз атанды. Жүлде ретінде 13 автокөлік пен бір пәтер иеленген. Сонымен қатар «Алтын тұғыр» сыйлығының лауреаты әрі «Жетісу батыры» төсбелгісінің иегері.
Сайлау учаскесіндегі дауыс беру барысы барлық талапқа сай, тыныш әрі ұйымдасқан жағдайда өтуде. Бектеновтер отбасының белсенділігі – азаматтық жауапкершілік пен берік отбасылық тәрбиенің жарқын көрінісі.
Сарби ӘЙТЕНОВА
