«Жастар» саябағындағы Ту тұғыры алаңында Қазақстан Республикасы жаңа Конституциясының күшіне енуіне орай облыстық ішкі саясат басқармасы ұйымдастырған флешмоб өтті.
Шараға қатысушылар Қазақстан Республикасының Мемлекеттік Туын ұстап, халықтың бірлігін, қоғамдық келісімді және конституциялық қағидаттарға адалдықты бейнелейтін символикалық композиция құрды. Патриоттық рухта өткен акция Конституцияның мемлекеттіліктің берік негізі, азаматтардың құқықтары мен бостандықтарының кепілі екенін тағы бір мәрте айқындады.
«Jetisu jastary» КММ директоры Арнай Байжұрынов мұндай іс-шара жас ұрпаққа патриоттық тәрбие беруде маңызды рөл атқаратынын айтты.
– Конституция – әрбір азаматтың құқықтары мен бостандықтарын, міндеттерін айқындайтын мемлекетіміздің берік іргетасы. Жастардың мемлекеттік рәміздерге деген құрметін нығайтып, жауапкершілік сезімі мен Отанға деген сүйіспеншілігін қалыптастыруға ықпал ететін шараларды жиі өткізгеніміз жөн. Сонда ғана жас буын заңның, бірлік пен қоғамдық келісімнің қадір-қасиетін терең түсінеді, – деді ол.
«Jetisu jastary» КММ ұйымдастыру бөлімінің маманы Маржан Әбдулманаптың айтуынша, мұндай іс-шараға қатысу жастардың қоғамдық өмірге белсенді араласуына және ел болашағы үшін жеке жауапкершілігін сезінуіне мүмкіндік береді.
– Флешмобқа қатысқан 50 шақты жастың ортақ мақсаты – Конституцияны құрметтеу, патриотизм және қоғам алдындағы жауапкершілікті сезіну. Осы арқылы біз жастарды ел өміріне белсенді қатысуға ынталандырамыз, – дейді маман.
Ұйымдастырушылардың айтуынша, осындай патриоттық іс-шараларды өткізу жастардың құқықтық мәдениетін нығайтуға, мемлекеттік рәміздерге деген құрметті қалыптастыруға және елдің бүгіні мен болашағына деген жауапкершілік сезімін тәрбиелеуге ықпал етеді.
Өз тілшіміз
