Сапалы білім, саналы тәрбие алып жатқан шәкірттің шұғыладай нұр төгіп, шұғадай құлпырғаны ұстаз бен ата—анаға, мектепке ғана абырой емес, салмақтай білсе өскен жер үшін де мерей ғой.
Бүгінгідей білім мен біліктілік бәсекеге түскен заманда заңғар шыңға ұмсынған ұғымтал жастардың әр жетістігін желпінте жазып, табысына тілеулес болу да бірін-бірі батыр деген өсер елдің өнегелі өмірінің жазылмаған жоралғысы іспетті. Осы орайда Қазбек Асланұлы есімді өреннің жетістігін жетісулықтарға сүйіншілеуге негіз бар деп санаймыз.
Шағын ғана толғамға кейіпкер болған Қазбек Асланұлы ұлтымыздың құндылығын дәріптейтін, рухымызды биіктетіп, сенімімізді жігерлендіретін ұрпаққа сенім білдіруге негіз болатын оқушы. Ол білімі мен тәрбиесінің негізінде мектебінің атын шығарып жүрген дарынды шәкірт. Жас құрақтай жаңа жайқалып келе жатқан жастың сол талабына жуырда алған марапаты да дәлел болмақ.
«Жаңа Қазақстан – білім беру саласындағы жаңашыл идеялар» атты патриоттық жоба аясында «Bilim orkeniet» ұлттық иновациялық ғылми-зерттеу орталығының ұйымдастырумен республикалық байқау өткен болатын. Астанада қаласында өрнек тапқан «Тәуелсіздік алтын тұғырымыз» атты бұл байқауға еліміздің түкпір-түкпірінен таланты жастар қатысты. Қабілеті мен қарымын білімімен ұштастырған 100-ге тарта озат ойлы оқушылар арасында жерлесіміз Қазбек даралана білді.
Талдықорған қаласы №14 мектеп-гимназиясының 10 сыныбында оқып жатқан Қазбек Асланұлы аталған бәйгеде шашасына шаң жұқтырмады. Ой еркіндігін, таным көкжиегінің кеңдігін байқатты. Қаламға жүйріктігін көрсетті. Осылайша ол ел Президенті Қасым-Жомарт Тоқаевтың «Тәуелсіздік бәрінен қымбат» бағдарламалық мақаласын жас ұрпақтың арасында кеңінен насихаттау және патриоттық сезімдерін арттыру мақсатында өткізілген респуликалық «Тәуелсіздік алтын тұғырымыз» байқауында жүлделі І орынды иеленді. Осылайша жетісулық оқушы диплом және «Тәуелсіздік дарыны» төсбелгісімен марапатталды.
Асыл СҰЛТАНҒАЗЫ
