Мемлекет пен кәсіпкерліктің әріптестігі қағидаттары негізінде өңірдің әлеуметтік-экономикалық дамуына жәрдемдесетін «Жетісу» ӘКК билік пен бизнес арасында алтын көпір қызметін атқарады. Корпорация әлеуметтік маңызы бар азық-түлік тауарларының бағасын тұрақтандырып, бірлескен кәсіпорындарды дамытуға және инвестициялар тартуға қатысады.
Жақында «Жарық» әлеуметтік дүкені пайдалануға берілді. Аталмыш сауда үйі бұрынғыларға қарағанда әлдеқайда кең және заманауи. Дүкеннің ашылуында Талдықорған қаласы әкімінің орынбасары Рүстем Бершінбеков сөз сөйлеп, алдағы уақытта мұндай дүкендер көптеп ашылатынын айтты. Дүкен сатушыларына тұрғындарға адал, мінсіз қызмет көрсетуді тапсырды.
«Жетісу» ӘКК мен «Свет-Ко» ЖК әлеуметтік дүкенді жаңарту және жабдықтау жұмыстарын сәтті аяқтады. Бөлмені күрделі жөндеуден өткізу арқылы тұрғындардың керек-жарағын тез тауып, еркін жүріп-тұруына мүмкіндік тудырды. Бұл дүкенде азық-түлік, тұрмыстық химия, сусындар және басқа да тауарлардың кең ассортименті жинақталды. Нарықтық бағадан 15-20%-ға төмен 18 тауар түрі ұсынылады. Мысалы, дүкендегі 1-ші санаттағы жұмыртқаның ондығы 445 теңгеден сатылады. Күнбағыс майының бір литрі 510 теңге. Күріштің келісі 340 теңгеден ұсынылуда. Картоптың келісі 110, пияздың келісі 70 теңгеден саудалануда.
Айта кетейік, қазіргі уақытта облыс бойынша ӘКК-нің 6 әлеуметтік дүкені бар. Оның ішінде Талдықорған қаласында 2 әлеуметтік дүкен, Үштөбе қаласында 1 әлеуметтік дүкен, сондай-ақ, «коммуналдық базарда», «әлеуметтік базарда» және «Көкбазар» сауда үйінде бірнеше сауда нүктелері жұмыс істейді. «Жетісу» әлеуметтік кәсіпкерлік корпорациясы халық тығыз орналасқан шағын аудандарда осындай форматтағы дүкендерді көптеп ашуды жоспарлап отыр.
Гүлжан ТҰРСЫН
