Спорт – мемлекеттің қуатын, ұлттың тұтастығы мен ішкі рухын айқындайды. Әлемдік аренада көк туымызды желбіретіп, әнұранымызды шырқатқан спортшының жеңісі тек жеке шеберліктің нәтижесі емес, ол – тұтас бір мемлекеттің беделі, ұлттың мерейі. Сол жеңістің артында ұзақ жылғы жоспар, темірдей тәртіп және қоғамның мызғымас қолдауы бар. Саясат елдің бағытын түзеп, жүйелі жағдай жасаса, спорт сол мемлекеттің әлеуетін, жастарының жігерін бүкіл әлемге паш етеді.
Құрылтай – біздің қанымызға сіңген төл демократиямыз, алқалы жиын арқылы ең күрделі мәселені шешудің бірегей институты. Бүгінгі жаңа дәуірде бұл тарихи дәстүр заман талабына сай қайта жаңғырып, мемлекет пен қоғамның арасындағы ашық сұхбат алаңына, ел болашағын бірге жобалайтын стратегиялық күшке айналды.
Спорттағыдай, саясатта да жеңіске құр сөзбен жету мүмкін емес. Олар әр секунд сайын шешім қабылдап, нақты нәтиже үшін соңғы демі қалғанша күреседі. Дәл сол сияқты, бүгінгі саяси науқандар мен елдік реформалар кезеңінде әр азамат негізгі ойыншы болуға тиіс. Бейқамдық – ұлтты әлсірететін басты дерт. Өзгеріс өзгеден емес, әрқайсымыздың белсенді қадамымыздан, өз таңдауымызға жауапкершілікпен қарауымыздан басталады.
Құрылтайға келу, өз даусыңды беру, қоғамдық бастамаларға үн қосу – бұл әр саналы азаматтың туған жер алдындағы тікелей перзенттік борыш. Күрессіз жеңіс, табандылықсыз табыс болмайды. Ендеше, ұлт намысы сынға түскен саяси науқандарда дала батырларындай білек сыбана кірісіп, ортақ шешімге бір кісідей атсалысайық. Бірлігі мен тәртібі мығым, азаматтық ұстанымы берік ел ғана кез келген аламанда оза шаппақ!
Болат Сәбит
«Жетісу-2» волейбол клубының жаттықтырушысы
