Жидебайдың өркеш-өркеш тауларына, манатқа малынған жоталарына қарап жанары жасаураған ақынның көкірегі көріктей қызған. Қарауылдың солтүстік шығысына қарай қарауытқан шоқының өзі аулақтап кеткендей. Сүтпісірім уақыт жөңки салар жол да шұбалып кеткендей. Сапар ұзақ көрінгенімен өмірдің тұтамдай екеніне сезінген Ибраһим Құнанбайұлы жиырмаға енді шыққан жасында талай мәрте сырласқан, рухани жақын тұтқан асылын жоқтап күрсінді. Орда бұзар шағында жүрегін тілгілеп Шоқан өлімін естіртті.
Иә, алып Абайдың бұл ақырғы күрсінісі емес еді. Бұдан бұрын да, кейін де талай рет тірліктің шоқпыт-шоқпыт жолын басты, шоқпарлы таяғын жеді. Қодар мен Қамқа қасіретінен кейін де «қалың елім қазағым, қайран жұртым» деп надандықпен, білместікпен алысты. Бес дұшпаннан жерініп, бес асыл істі мұрадым мұратқа айналдыру жолында қара өлең мен қара сөзге зейін қойды. Осылайша жанары жарық, жүрегі жас данышпан Абай, хәкім Абай мыңжылдық сүрлеуін түзді. Қазақ бар жерде өз есімі мәңгі айтылар алыпқа айналды.
Сол шыңдай шынарлы тұлғамызды бүгінгі ақындар да жырмен ұлықтап келеді. Абай күніне орай С. Сейфуллин атындағы облыстық орталық кітапханасында жыр мүшәйрасы өтті. 35 жастан жоғары жетісулық ақындар қатысқан «Абай – даналықтың дара шыңы» атты жыр бәсекесі жоғары деңгейде ұйымдастырылды.
Облыстық мәдениет, архивтер және құжаттама басқармасы, Халық шығармашылығы орталығы мен С. Сейфуллин кітапханасы бірлесе өткерген жыр аламаны елімізге белгілі ақындар мен аудан-ауданда тірлік кешіп жатқан қаламгерлердің рухани жарысына ұласты. Теңіздей терең, таудай биік Абайдың рухани мұрасын арқау еткен ақындар төл туындыларын оқып, ұлттық руханиятты дәріптеді.
Мың жылдықтан тамыр тартқан құндылықтарды дәріптеп, қазақтың кешегісі мен бүгінін бағдарлап берген ұлы тұлғаға арналған бәйгеде қазақтың айбоз ақыны, Халықаралық «Алаш» әдеби сыйлығының лауреаты Әміре Әрін бас жүлдені еншіледі. Қара өлең көшінде жалынды жырларымен қазақ оқырманын сүйсінткен Қазақстанның Құрметті жазушысы, ақын Нүсіпбай Әбдірахым 1-орын иегері деп танылса, белгілі ақын, Қазақстан Жазушылар одағының мүшесі Жомарт Игіман мен алакөлдік шайыр Қадырсұлтан Нүсіпхан 2-орыннан көрінді. Ұлы тұлғаның өмірі мен әдебиет әлеміндегі айшықты орнын жыр еткен Ясин Қалиәкпарұлы, Сатыбалды Қуантай, Талапбек Азанбай 3-орын иегері деп танылды.
Орталық кітапханада өткен марапаттау салтанатында облыстық мәдениет, архивтер және құжаттама басқармасының басшысы Қуаныш Сүлейменов ұлы тұлға туралы толғанып, даланың дара перзентіне айналған бабаға арналған мүшәйраның маңыздылығын атап өтті. Осындай жыр аламанында жеңіс тұғырынан көрінген шайырлар мен додаға қатысқан өзге де ақындарға алғысын жеткізді. Жыры жүйрік шыққан бәйгелі азаматтар ақшалай сыйлықпен, Абай баба кітабымен мерейленді.
Асыл СҰЛТАНҒАЗЫ
