Халық денсаулығын сақтау мен өмір сапасын жақсарту – мемлекет саясатының басым бағыттарының бірі. Осы міндетті жүзеге асыру жолында тұрғындарды қажетті дәрі-дәрмекпен қамтамасыз ету ісіне айрықша мән беріліп келеді. Өйткені дер кезінде алынған ем мен тиімді препарат көптеген дерттің асқынуына жол бермей, азаматтардың қалыпты өмір сүруіне ықпал етеді.
Қазақстанда фармацевтикалық қолдау жүйесі екі бағыт бойынша жүзеге асырылады. Біріншісі – азаматтардың жеке қаражаты есебінен дәрілік өнімдерді сатып алуы болса, екіншісі – мемлекет тарапынан көрсетілетін қолдау. Атап айтқанда, Қазақстан Республикасы Денсаулық сақтау министрінің 2021 жылғы 5 тамыздағы ҚР ДСМ №75 бұйрығына сәйкес тегін медициналық көмектің кепілдік берілген көлемі мен Міндетті әлеуметтік медициналық сақтандыру жүйесі аясында тұрғындардың белгілі бір санаты қажетті препараттармен тегін қамтылады.
Бүгінде қант диабеті, жүрек-қан тамырлары сырқаттары, туберкулез, қатерлі ісік, бронх демікпесі, вирустық гепатит секілді әлеуметтік маңызы жоғары әрі созылмалы аурулар бойынша диспансерлік есепте тұрған азаматтарға мемлекет есебінен емдік құралдар беріледі. Бұл тізім Қазақстан Республикасы Денсаулық сақтау министрлігі бекіткен арнайы нормативтік құжаттарға сәйкес айқындалған.
Мұндай қолдауға ие болу үшін тұрғындар өз емханасына тіркеліп, диспансерлік бақылауда тұруы қажет. Дәрігердің тексеруінен кейін элек-трондық рецепт рәсімделеді. Осы құжат негізінде қажетті препараттар ТМККК және МӘМС бағдарламаларына қатысатын дәріханалар арқылы беріледі. Көп жағдайда мұндай пункттер емдеу ұйымдарының жанынан ашылған.
Кей жағдайда қажетті атаудағы өнім уақытша қолжетімсіз болуы мүмкін. Мұндай сәтте науқас емдеуші дәрігеріне жүгініп, балама нұсқаларды қарастыруға немесе әрі қарайғы әрекеттер жөнінде түсініктеме ала алады. Сондай-ақ, электрондық рецептің жарамдылық мерзімі шектеулі екенін ескерген жөн. Сондықтан маман тағайындағаннан кейін дәріханаға дер кезінде барған абзал.
Тегін дәрілік қамтамасыз ету жүйесі – созылмалы дертке шалдыққан азаматтарды әлеуметтік тұрғыдан қолдаудың маңызды тетігі. Бұл бастама халықтың қажетті емге қолжетімділігін арттырып қана қоймай, аурулардың асқынуының алдын алуға және тұрғындардың өмір сүру сапасын жақсартуға септігін тигізеді.
Дәрі-дәрмекпен қамтамасыз ету мәселелері бойынша сұрақтар туындаған жағдайда тұрғындар Қазақстан Республикасы Денсаулық сақтау министрлігі Медициналық және фармацевтикалық бақылау комитетінің Жетісу облыстық департаментінің call-орталығына +7 701 006 59 19 нөмірі арқылы хабарласып, кеңес ала алады.
ҚР Денсаулық сақтау министрлігі
Медициналық және фармацевтикалық
бақылау комитетінің
Жетісу облыстық департаменті
