Ақтау қаласынан 25 шақырым жердегі теңіз жағалауына «Баку-Грозный» бағытындағы жолаушылар ұшағы құлады. Әуе апатынан жарақат алған жолаушыларға жәрдем беру үшін еріктілер Талдықорғандағы облыстық қан орталығына келіп, қан тапсырды.
Небәрі 10 минуттың ішінде 15 ерікті қан тапсыруға тіркелді. Олар жора-жолдастары мен таныстарын да шақырып, адам өміріндегі ең игі істерінің бірі – мұқтаж жандарға қамқорлық жасау екендігін айтуда.
– Ақтау қаласының маңында болған әуе апаты бәріміздің көңілімізді жабырқатты. Біз осындай қиын-қыстау сәтте ел болып жұмылуымыз керек, – дейді «Ассамблея жастары» еріктілер тобының мүшесі Заида Құрмашева.
Облыстық қан орталығының директоры Марат Досқалиев:
– Мекемеге әуе апатынан жарақат алған, қанға мұқтаж жандарға көмек көрсетеміз деп ерікті жастар жиналуда. Бірақ, қан Ақтауға жіберілмейді. Өйткені Ақтаудағы қан тапсыру орталығында қан жеткілікті. Егер ақтаулықтар жедел қан керек десе біз жіберуге дайынбыз, – деді.
Айдар ҚАЛИЕВ
