Алматы облыстық мәслихаттың тұрғын үй-коммуналдық шаруашылығы және құрылыс мәселелері жөніндегі тұрақты комиссиясының көшпелі отырысы өтті. Облыстық мәслихат депутаты Бағдәулет Үстеновтің төрағалығымен өткен отырыста тұрақты комиссияның 2021 жылы атқарған жұмысы қорытындыланып, ағымдағы жылға арналған жұмыс жоспары таныстырылды. Сондай-ақ, облыстық сәулет және қалақұрылысы басқармасының бас жоспар бөлімінің басшысы Айдос Күнесбаев ұсынған қала құрылысын ерекше реттеу аймағында орналасқан облыс аумағындағы қала құрылысын жоспарлаудың кешенді сызбасы қаралып, бекітілді.
Бағдаулет Нығыметбекұлының айтуынша, өткен жылы тұрақты комиссия 6 отырыс өткізіп, күн тәртібінде 11 мәселе қаралыпты. Нәтижесінде 24 хаттамалық тапсырма беріліп, оның 18-і орындалған. Отырыстарда 13 аудан және қала әкімі, сондай-ақ, 5 уәкілетті орган басшысының есебі тыңдалған. Сонымен қатар, тұрақты комиссия депутаттары Жол картасы бойынша әлеуметтік нысандарға жүргізіліп жатқан құрылыс жұмысы барысын бақылау мақсатында 60 әлеуметтік нысанға барып, тиісті анықтамалар жасаған. Аудан-қалалардағы 724 білім мекемесінің оқу жылына дайындығын қарап шыққан. Көмір тапшылығы бойынша аудан, қалаларда рейд жұмысын ұйымдастырса, маусым айында мүліктің меншік иелері бірлестігі немесе жай серіктестік институтын енгізу жөніндегі реформаны жүзеге асыру бойынша халықпен кездесіп, насихат жұмысына белсене қатысқан.
Комиссия мүшелері газдандыру, тұрғын үйге жүргізілетін күрделі жөндеу жұмысы, кондоминиум объектілерін басқару формасының жаңа институтын енгізу бойынша атқарылған жұмыстарға, әлеуметтік нысандардың жылу маусымына дайындығы бойынша мәселелерге ерекше назар аударып, оң шешім табуына қолдау көрсеткен.
Келесі кезекте сөз алған Айдос Күнесбайұлының айтуынша, бүгінде облыс аумағындағы қала құрылысын жоспарлаудың кешенді жобасын екі кезең бойынша әзірлеу жұмысы аяқталыпты. Аталған жобада аймағымыздағы 17 аудан, 3 облыстық, 7 аудандық маңызы бар қала, 731 ауыл мен 246 ауылдық округтің шегаралары толық қамтылған. Кешенді сызбасының негізгі мақсаты – қала құрылысын дамыту стратегиясын айқындау, орнықты әлеуметтік-экономикалық кешен жағдайларын, экологиялық – қала құрылысы жағдайлары мен қолда бар ресурстық әлеуетті ескере отырып, халықтың тыныс-тіршілігінің қолайлы жағдайларын және елді мекендер аумақтарын орнықты дамыту.
Осыған орай дайындалған сызбада аймақтың 2050 жылға дейінгі көліктік-логистикалық жүйесін дамыту, рекреациялық аумақтар мен демалыс аймақтарын ұйымдастыру, тарихи-мәдени мұраны сақтау және Ұлы Жібек жолын жаңғырту жөніндегі іс-шаралар бойынша шешімдер айқындалған.
Отырыс аясында қала құрылысының кешенді сызбасын орындаған мердігер компания өкілі Любовь Нысанбаева кешенді сызба облыс аумағында қала құрылысын жоспарлаудың цифрлық нұсқасын жасауға мүмкіндік беретінін атап өтті. Өйткені, жұмыс «Цифрлық Қазақстан» мемлекеттік бағдарламасының талаптарымен байланыстырып орындалған және облыстың қазіргі жай-күйін ғана емес, сонымен қатар, жобалық кезеңдер бойынша жобалық даму параметріне сәйкестендірілген. Сондықтан кешенді сызба ҚР цифрлық базасын (BIG DATA) қалыптастыруға да көмектеседі.
Соңында тұрақты комиссия 2022 жылға арналған жұмыс жоспарын бекітті. Онда қалалар мен елді мекен аумағын абаттандыру, жолдар мен көшелерді жарықтандыру, «Нұрлы жер» мемлекеттік бағдарламасы аясында халықты сапалы ауызсумен және су бұру қызметтерімен және халықты тұрғын үймен қамтамасыз ету, тағы да басқа әлеуметтің әлеуетін көтеретін маңызды жобалар қарастырылған.
Қажет АНДАС
Алматы облысы
