Балқаш өңірінде 1111 шаруа қожалығы бар. Аудан бойынша 130 бас түйе, 27 793 бас жылқы, 97 710 бас ірі қара және 97 585 қой-ешкі, сонымен бірге әртүрлі құс өсіріледі. Қысқы мал азығын дайындау мақсатында өңірде 178 мың тонна шөп, 20 мың тонна жем, 53 мың тонна пішендеме дайындалған.
Өңірдегі мал баққан ағайынның қыс мезгілін қалай өткізіп жатқанын көру үшін аудандық ауылшаруашылығы және жер қатынастары бөлімінің бас маманы Нұралы Шүленбаевпен Бірлік ауылдық округіне қарасты «Бақнұр» шаруа қожалығына арнайы бардық. Біз ат басын бұрған шаруашылықта 50 бас жылқы, 590 бас ірі қара болса, оның 400 басы аналық, 20 бас Қазақтың Ақбас тұқымды бұқасы, қалғаны тана-торпақ, бұқашалар екен.
Шаруашылық басшысы Айдар Аймақовтың айтуынша, 2003 жылы мемлекеттік жер қорынан келісімшарт арқылы 2 мың гектар жер алып, мал өсірумен айналыса бастаған. Кейінгі жылдары мал басы көбейіп, Бақанас орман шаруашылығынан 7 500 гектар және Қаратал орман шаруашылығынан 2 100 гектар жер алып шаруашылықтың керегесін кеңейтіпті. Бүгінгі таңда ірі қараларды жас ерекшеліктеріне қарай үш топқа бөліп, әрқайсына жеке қыстау салыпты, қора-жайлары да талапқа сай жасалған.
Қысқы мал азығы биылға жеткілікті, малы қоңды, көңілі жайлы десек болады. Өйткені, жаз мезгілінде 2 мың орама шөп жинаса, оның 600 орамасы күріш сабаны, 500 орамасы жоңышқа аралас бидай сабаны, қалғаны екінші орылым жоңышқа. Мұның сыртында 10 тонна әртүрлі жем түсірілген.
Қыстауда малшыға арналған үш бөлмелі үйге жарығы күн сәулесінен қуат алатын құрылғы орнатылған. Шаруашылықтағы ірі қараның өсіп-өнуіне сүбелі үлес қосып жүрген Аманжол Қомытов пен зайыбы Алтынхан Сейсекеқызының осы қыстауда тұрып жатқанына 7 жыл болыпты. Ерінбей еңбек етудің арқасында азды-көпті несібелерін тауып, екі ұл, екі қыз тәрбиелеп, тапқан табысын қанағат етіп отырған отбасы.
Жалпы, «Бақнұр» шаруа қожалығында еңбек етіп жүрген малшылардың жағдайы жаман емес. Оларға ай сайын тұрақты түрде жалақы төленсе, одан бөлек мал төлдету науқанында әр 100 бұзаудан 5 бас бұзау беріледі. Малшыларға басқа да көмектер көрсетіліп, жағдай жасалған.
Бақтығали ДӘУІТБАЕВ
Балқаш ауданы
Алматы облысы
