Қапшағай қаласында тұрғын үй құрылысы қарқынды.
Қапшағай қаласында баспаналы азаматтардың қатары артады. Заречный ауылында «Нұрлы жер» бағдарламасы аясында салынған 20 пәтерлі 5 көпқабатты тұрғын үй бой көтерді. Жалпы аумағы 1380,7 шаршы метрді құрайтын заманауи үлгіде жасақталған баспанада электр желісі, ыстық және суық су, жылу жүйелері жүргізілген. Одан бөлек, автотұрақ, балаларға арналған ойын алаңы, қоқыс төгу орындары да жасалған. Күн жылынған соң тұрғын үй алаңын көгалдандыру, абаттандыру жұмыстары қолға алынып, айналасына ағаш, гүл отырғызу жұмысы қолға алынбақ.
Алдағы уақытта шаһарда 60 пәтерлі 3 тұрғын үй салу жоспарланған. Жобаның жалпы құны — 162,674 миллион теңге. Пәтер кілті толық емес отбасыларға, жетім балаларға, ұзақ жылдан бері кезекте тұрған бюджеттік мекеме қызметкерлеріне табысталады деп күтілуде.
Айта кетерлігі, бүгінде Қапшағай қаласында 3 мыңға жуық азамат үй кезегінде тұр.
«ЖЕТІСУ-АҚПАРАТ»
