Чехияның еліміздегі Төтенше және Өкілетті Елшісі Рудольф Гикл «Жетісу» әлеуметтік-кәсіпкерлік корпорациясы» өңірлік даму институты» АҚ мекемесінде болып, артынша әкімдікте іскерлік байланысты нығайту тұрғысында облыс әкімі Бейбіт Исабаевпен жолықты.
– Екі елдің қарым-қатынасын нығайту, серіктестікті күшейту мақсатында жаңа әлеуметтік-экономикалық жобаларды бірлесіп іске асыруға ниетіміз бар. Мәселен, Текелідегі ашытқы зауыты толық чехиялық құралдармен жабдықталған. Одан бөлек, асыл тұқымды ірі қараны өсіру тұрғысында да екі елдің байланысы жақсы. Келешекте талай ірі жобаларды ұзақ мерзімге бірлесе отырып атқару ойымызда бар, – деді облыс басшысы.
Өз кезегінде Рудольф Гикл тек ауыл шаруашылығымен шектеліп қалмай, чехиялықтар технология саласында да ынтымақтасуға дайын екенін айтып, туризм мен білім беру саласында екі елдің дамыған базасының болуы үлкен мүмкіндіктерге жол ашатынын жеткізді.
«Жетісу» әлеуметтік-кәсіпкерлік корпорациясында болған отырыста Жетісу облысының ауыл шаруашылығы басқармасының басшысы Нұрдәулет Кененбаев Елшіге өңірдің сала бойынша жетістіктерін айтып, болашақ жоспарлармен бөлісті. Елшімен ере келген 30 жылдан бері «JK Мachinery» маркалы ауыл шаруашылығына бағытталған технологияны жасайтын және 2005 жылдан қызмет етіп келе жатқан «DIKAN» компанияларының өкілдері өз өнімдерін таныстырып, келіссөз жүргізуге дайын екенін білдірді. Алдағы уақытта аталған бағыттар бойынша жұмыстар жүргізілмек.
Қали АСҚАР
Жетісу облысы
