Облыс әкімінің міндетін атқарушы Лаззат ТҰРЛАШОВТЫҢ төрағалығымен жылыту маусымына дайындық жұмыстары бойынша селекторлық режимде кезекті жиын өтті. Облыстық энергетика және тұрғын үй-коммуналдық шаруашылық басқармасы, әділет және экология департаментінің басшылары, аудан, қала әкімдері қатысқан басқосуда иесіз электр желілері мен «Мүліктік меншік иелерінің бірлестігі» институтын енгізу жөніндегі реформаны жүзеге асыруға арналған мәселелер қаралды.
Жылыту маусымына дайындық жұмыстары қызу жүріп жатқанын баяндаған облыстық энергетика және тұрғын үй-коммуналдық шаруашылық басқармасының басшысы Бағлан Тәнекенов бюджеттік ұйымдар үшін 26 млн. литр дизель отынын сатып алуға 5,2 млрд. теңге бөлінгенін хабарлады.
– Қазіргі таңда 24,5 млн. литр дизель отыны сатып алынып, жеткізілу жұмыстары басталды. 115 мың литр нысандарға жеткізілді. Аудан, қала әкімдері мердігермен жеткізу кестесін бекітуге мән беруін сұраймын. Энергия кәсіпорындарына жоспарға сәйкес 405 мың тонна көмір және 14,5 мың тонна мазут қажет. Мазуттың бағасы тамыз айында бекітілуіне байланысты жұмыстар тоқтап тұр, – деген Бағлан Сағындықұлы 29 800 тонна көмір сатып алынғанын және жылыту маусымы басталғанға дейін жеткізуді тездетіп, барлық сыйымдылықтарды толтыруды қамтамасыз ету қажеттілігін атап өтті. – Энергия кәсіпорындары бекітілген жоспарға сәйкес жұмыс жүргізуде. Жылумен жабдықтау нысандарында 35 орталық қазандық пен 54 шақырым жылу желілері жөнделуде. Талдықорған қаласының екі қазандығын газ жүйесіне ауыстыру жұмыстары басталды.
Басқарма басшысы Бағлан Тәнекеновтың сөзінше мемлекеттік-жекешелік әріптестік шеңберінде биыл 36 блокты-модульдік қазандық орнату жоспарланған. 25 жоба бойынша конкурстың қорытындысы шығарылып, келісімшартқа қол қойылуда. Жеке тұрғындар үшін жылыту маусымына 1,37 млн. тонна көмір қажет. Жазғы уақытта көмір сатып алу мен теміржол қатынасы жоқ аудандарда жүк көліктері арқылы жеткізу жұмыстары басталды. Аудан, қала әкімдіктері тұрғындарды көмірмен қамтамасыз етуді қатаң бақылауға алуы тиіс.
Келесі кезекте коммуналдық және иесіз қалған электр желілері тұрғысында мәселе көтерілді. Облыс бойынша барлығы 35 300 шақырым электр беру желілері және 7 600 трансформаторлық қосалқы стансы бар. Соның ішінде 2 035 шақырым желі коммуналдық болса, 311 шақырым желі иесіз. 769 коммуналдық трансформаторлық қосалқы стансы болса, 44 стансы иесіз. Олардың көпшілігінің тозығы жеткен.
– Үздіксіз электрмен қамтамасыз ету желілері үнемі техникалық қызмет көрсету мен жөндеуді қажет етеді. Коммуналдық және иесіз қалған электр желілерін жөндеуге арналған мамандандырылған ұйымдардың болмауы салдарынан көп аудандарда апаттық жағдай орын алады. Бұл тарифтің өсуіне әкеп соғып, халықтың наразылығын туғызады. Басқарма тарапынан жиындар өтіп, түсіндіру жұмыстары жүргізілді. Коммуналдық және иесіз қалған электр желілерін қамтамасыз ету үшін 1,5 млрд. теңге кетеді. Әрине, мұндай қаражат бөле алмаймыз. Сол үшін жұмыс тобы құрылып, аудан, қалаларды аралап жүр. Олардың құжаттарын жөндеп, республиканың балансына беруіміз керек, – деген Бағлан Сағындықұлы «Мүліктік меншік иелерінің бірлестігі» институтын енгізу жөніндегі реформаны жүзеге асыру бойынша жұмыс төмен дәрежеде жүргізіліп жатқанын айтты. Мысалы, жыл соңына дейін 602 мүліктік меншік иелерінің бірлестігін құру жоспарланған. Бір аптаның қорытындысы бойынша 9 мүлік иелері бірлестігі мен 72 жай серіктестік құрылған. Облыс бойынша құрылған жай серіктестіктер саны 871. Бірақ, құрылған серіктестіктерді растайтын құжат 159 тұрғын үйде ғана бар.
Жиынды қорытындылаған Лаззат Махатұлы осындай олқылықтары тездетіп жою мен жылыту маусымына дайындық жұмыстары баяу жүріп жатқан аудан, қала әкімдеріне ескерту жасап, кеткен кемшіліктерді түзету үшін тапсырма берді. Әсіресе, халықты газбен қамтамасыз ету жұмысына үлкен жауапкершілікпен қарауды тапсырды.
Мәулен ӘНЕРБАЙ
