Қапшағай қаласының Шеңгелді аумағындағы шаруалар үшін пияз өсіру дәстүрлі кәсіпке айналған. Пияз осы аймақтың бренді десе де болады. Шаруа қожалықтары пияздың голландиялық сорттарын өсіріп отыр. Бұл сорттар дәрумендер мен минералдарға бай. Мәселен, өнімнің 100 грамында 10 мг. астам аскорбин қышқылы болады. Биыл қапшағайлықтар мол өнім алып, 1700 гектар жерден 85 мың тонна пияз жинап, әр гектарына өнім 506,3 центнерден айналды.
Қапшағай қаласы әкімдігінің мәліметіне сүйенсек, Қапшағай өңірінде көкөністер арасында пияз ерекше маңызға ие. Алқап көлемі жағынан да алғашқы орында. Бұл осы пайдалы өнімге деген сұраныстың көптігіне байланысты.
Өңірде пияз өсірумен 50 шақты шаруа қожалығы айналысады. Олардың арасында облыстың ауылшаруашылығын дамытуға 20 жылдан бері үлес қосып келе жатқан «NazDana» ЖШС да бар. Ол өз жұмысында тұқым түрлерін ірілендіруге, өндіріс көлемін арттыруға елеулі көңіл бөліп келеді. Сол сияқты жаздық арпа, қант қызылшасы, картоп, пияз және басқа да дақылдарды өсіруге маманданған.
– Бүгінде жұмыс үрдісін автоматтандыру барлық салаға дендеп енді. Заманауи аграрлық технология белсенді қолданылады, ғылыми жетістіктерді де басшылыққа алғанның пайдасы зор. Біз осы үрдістерден қалмауға тырысамыз. Бұл еңбек өнімділігін арттыруға зор ықпал етіп, өнім көлемін молайтуға септігін тигізеді. Қазіргі кезде 140 гектар жердің 70 гектарына дәндік жүгері егілген, 27 гектар қант қызылшасы, 15 гектар көк жуа, қалған 8 гектары жеміс-жидек. Биыл өткен жылдағыдай әр гектарынан 600 центнерден өнім аламыз деп шамалаудамыз. Оған қоса биыл жүгерінің де шығымы жақсы болды. Біздің өнімдеріміз облыстың нарығына ғана емес, Алматы қаласының да сауда нүктелеріне жеткізіледі. Мәселен, «Алтын Орда» базарынан, «Магнум», «Метро», «Агромарт» сияқты сауда желілерінен табуға болады.
Сондай-ақ ТМД елдеріне, кейінгі кезде Еуропаға да экспортталуда. Қазір өнімнің барлық түрін сыйымдылығы 300 тонналық қоймаға жинап, қысқа сақтауға дайындаудамыз, – дейді аталған ЖШС басшысы Нұрлан Етекбаев.
Атап өтерлігі, серіктестік қайырымдылық шараларына да көп көңіл бөледі. Қапшағай қаласында 2021 жылы барлығы 13666 гектар егістік жер игерілген, соның 8448 гектары суармалы алқап. 4917 гектары дәнді дақылдар, оның ішінде жаздық арпа 3941 гектар, дәндік жүгері 976 гектар, майлы дақылдар 3437 гектар, картоп 400 гектар, көкөністер 1831 гектар, бақша дақылдары 250 гектар, қант қызылшасы 600 гектар, мал азығы 2231 гектар.
Облыстық ауылшаруашы-лығы басқармасының мәліметінше, өткен жылы пияздың егіс алқабы 5483 гектар болған, 195 мың тоннадан астам өнім жиналды, орташа шығымдылығы 357 ц/га. Биыл 5600 гектар пияз егілген, одан 161 мың тонна пияз жиналды. Өнім жинау 92,5 пайыз шамасында аяқталды. Қапшағайға келетін болсақ, мұнда пияз жинау науқаны толық бітті. Жалпы Қапшағайдағы көкөніс сақтау қоймаларындағы 30 мың тонна көкөністің тең жартысы пияз.
Облыс әкімінің баспасөз қызметі
