Қазақстан Республикасы Бәсекелестікті қорғау және дамыту агенттігінің Алматы облысы бойынша департаменті Талғар ауданы, Арқабай ауылы тұрғындарының ауылды газдандыруға қатысты «Дәрмен-Арқабай» ЖШС-ға қатысты өтінішін қарады.
Өтінішті қарау барысында департамент Талғар ауданы Арқабай ауылындағы орамішілік желілердің құрылысын серіктестік инвестициялық қаражат есебінен жүзеге асыратынын анықтады. Сондай-ақ, серіктестік құрылыс-монтаждау жұмыстарын көрсеткен кезде жеке тұлғалар үшін газбен жабдықтау желілеріне қосылу құны 360 мың теңге мөлшерінде жоспарланып отыр. Бұл сомаға орамішілік желілерді және жеткізуші газ құбырын салу құны кіреді. Алайда абонент орамішілік желілер үшін төлеген кезде, желілердің өздері бұдан әрі абоненттің меншігі болып табылмайды.
Бүгінгі таңда серіктестік пен Талғар ауданы, Арқабай ауылының тұрғындары арасында жасалған шарттар жоқ.
Қазақстан Республикасы Кәсіпкерлік кодексінің 174-бабына сәйкес, үстем немесе монополиялық жағдайға ие нарық субъектілерінің тиісті тауар нарығына кіруді шектеуге, бәсекелестікті болғызбауға, шектеуге және жоюға әкеп соққан немесе әкеп соғатын және (немесе) нарық субъектісінің немесе тұтынушылардың айқындалмаған тобының заңды құқықтарына қысым жасайтын әрекеттеріне (әрекетсіздігіне) тыйым салынады.
Мәселен, кодекстің 198-бабына сәйкес Қазақстан Республикасының бәсекелестікті қорғау саласындағы заңнамасын бұзудың алдын алу мақсатында монополияға қарсы орган нарық субъектісінің, мемлекеттік органның, жергілікті атқарушы органның лауазымды адамына Қазақстан Республикасының бәсекелестікті қорғау саласындағы заңнамасын бұзуға әкеп соғуы мүмкін әрекеттерді жасауға жол бермеу туралы жазбаша нысанда алдын ала ескерту жібереді.
Жоғарыда баяндалғанның негізінде департамент серіктестіктің атына өз қызметін қолданыстағы заңнамаға қатаң сәйкестікте жүзеге асыру қажеттілігі туралы алдын ала ескерту жіберді.
«ЖЕТІСУ-АҚПАРАТ»
Сурет ғаламтордан алынды
