«Jetіsý media» алаңында «Алматы облыстық мәслихатының үстіміздегі жылдың I тоқсанындағы жұмыс қорытындылары және 2021 жылға арналған жоспарлар» тақырыбында баспасөз мәслихаты өткізілді.
Ағымдағы жылы Қазақстан Республикасы Парламенті Мәжілісі және барлық деңгейдегі мәслихат депутаттарын сайлау науқанының қорытындысы бойынша облыстан 360 адам депутаттыққа сайланды. Депутаттар бүгінде жұмысқа белсене кірісіп кеткен. Биыл – Қазақстан Республикасы Тәуелсіздігінің 30 жылдығы. Осыған байланысты жер-жерлерде тағылымды шара атқарылуда. Оның басы-қасында ел қалаулылары жүр. Талдықорған қаласының облыс орталығы дәрежесін алғанына да 20 жыл. Бүгінде мектептердің үш ауысыммен жұмыс істеуі жойылуда. Бұл орайда жаңа білім ошақтары салынуда. Халық қалаулылары осындай істердің өз дәрежесінде орындалуына септігін тигізуде. Таза ауызсумен қамтамасыз ету барысында облысымыз республика бойынша алдыңғы орында. Бірақ, әлде де атқарылар шаруа жетерлік. Мәслихат депутаттары осы орайда жұмыс атқаруда.
– Мекеменің алдағы уақытта атқаратын жұмыс жоспары төңірегінде 8 бірдей сессия өткізу жоспарланып отыр. Аталмыш жиындардың барлығы жыл соңына дейін өткізілмек. Бүгінгі күнге дейін 3 кезекті, 1 кезектен тыс сессия ойдағыдай өтіп, маңызды деп саналатын 28 шешім шығарылды. Негізінен облыстық мәслихатта 6 тұрақты комиссия тұрғын үй, ауылшаруашылығы, жер қатынастары, ветеринария, экономика, индустриялық-инновациялық мәселелер, денсаулық сақтау және дін істері бойынша қатынастарды ретке келтірумен айналысады, – деді облыстық мәслихат хатшысы Жанболат Жөргенбаев.
I тоқсан қорытындысы аясында 360 депутат қабылдау өткізіп, 693 адамның өтініш-арызы тыңдалған. Қабылдауда жолданған сұрақтардан 391 өтініш оң шешімін тауып, қалған 302 мәселе бойынша тиісті түсініктеме жасалып, бақылауға алынды. Облыстық мәслихат депутаттары 44 депутаттық сауал жолдады. Жалпы көтерілген мәселелерді шешу барысында депутаттар жергілікті басшылықпен бірлесе еңбек етуде. Елімізді жайлаған коронавирус індетімен күресте де халық қалаулылары елмен қоянқолтық жұмыс істеуде. Қайырымдылық шараларын ұйымдастыруда. Екі отбасыға әлеуметтік көмек ұйымдастырып, баспана әперді. Жалғызбасты қарт, мүгедек жан, көпбалалы отбасылар отын-су, азық-түлікпен қамтамасыз етілуде.
Айта кетейік, тікелей байланыс орнату үшін жер-жерлерде қоғамдық қабылдау ұйымдастырылады. Қазіргі таңда депутаттардың қабылдаулары Алматы облысы бойынша 20 аудан-қала және «Nur Otan», «Қазақстанның халық партиясы», «Ауыл», «Ақжол», «Адал» партияларымен бірге іске асырылуда. Депутаттар болашақта да елдің әлеуметтік жағдайын жақсарту барысында жүйелі жұмыс атқаруды мақсат етуде. Басты назарда мектеп, ауызсу, денсаулық сақтау салалары назарда ұсталады.
Гүлжан ТҰРСЫН
