Кез келген кәсіпорында, мекемеде немесе өндіріс орнында қауіпсіздік ережелерін сақтау – әр қызметкердің міндеті. Оны сақтау өндірістегі жазатайым оқиғалардың, жарақаттардың алдын алуға мүмкіндік береді. Еңбек қауіпсіздігінің басты мақсаты – адамның жұмыс орнында қауіпсіз еңбек етуіне жағдай жасау.
Өкінішке қарай, еліміздің 2024 жылғы деректерінде жазатайым оқиғалардың себептері арасында зардап шегушінің абайсыздығынан 744 жағдай тіркелсе, жол ережесін бұзу арқылы 14 жағдай өліммен аяқталды. Өндірістік жарақаттануға қатысты биылғы жылдың басынан бастап Жетісу облысындағы кәсіпорындар мен ұйымдарда 20 арнайы тергеп-тексеру жұмыстары жүргізіліп, нәтижесінде өндіріске байланысты 21 жазатайым оқиға тіркеліп, 27 жұмыскер зардап шекті. Оның ішінде ауыр дәрежелі жазатайым оқиғаға ұшырағандар саны 24 болса, өліммен аяқталған жазатайым оқиғалар саны 4 болды. Бұл деректерді Жетісу облысы бойынша мемлекеттік еңбек инспекциясы департаменті басшысының орынбасары Еркін Дәулетұлы айтты.
Өндірістегі жазатайым оқиғалар көбіне бір ғана себептен емес, бірнеше фактордың қатар әсер етуінен болады. Қазақстанның мемлекеттік органдары оларды техникалық, ұйымдастырушылық және жеке себептерге бөледі. Негізгі себептерге қауіпсіздік ережелерін бұзу, жұмысты дұрыс ұйымдастырмау, жұмысшыларды жеткілікті оқытпау, жеке қорғаныс құралдарын пайдаланбау, ақаулы жабдықтарды қолдану, технологиялық процестің бұзылуы, жұмыс орнының дұрыс ұйымдастырылмауы, қызметкердің шаршауы және абайсыздығы, еңбек және өндірістік тәртіпті бұзу, сондай-ақ көлік қауіпсіздігі талаптарын сақтамау жатады.
Еңбек қауіпсіздігі – адам өмірі мен денсаулығын қорғаудың негізгі шарттарының бірі және қауіпсіздік талаптарын сақтау арқылы өндірістегі жазатайым оқиғалардың алдын алуға, жұмысшыларға қолайлы еңбек жағдайын жасауға болады. Сондықтан әрбір адам өз жұмыс орнындағы қауіпсіздік ережелерін жақсы біліп, оларды күнделікті орындауы қажет, өйткені еңбек қауіпсіздігіне жауапкершілікпен қарау– өз өміріңді ғана емес, айналаңдағы адамдардың өмірі мен денсаулығын да қорғауды білдіреді. Өндірістегі жазатайым оқиғалардың алдын алудың ең тиімді жолы – жұмысшыларды тұрақты оқыту, қауіпсіздік ережелерін қатаң сақтау, жұмыс берушінің бақылауын күшейту және ақаулы жабдықтарды пайдаланбау.
«Жетісу-Ақпарат»
