Елімізде дәстүрлі түрде 34 аптаға созылатын оқу жылы аяқталуға жақын. Биыл 3,9 миллионнан астам оқушы оқу жылын аяқтайды. Оның ішінде 217 мыңнан астам түлек 11-сыныпты бітіреді, деп хабарлады Оқу-ағарту министрлігі.
23 мамыр күні еліміздің барлық мектептерінде «Білімім — Отаныма» тақырыбында бірыңғай сынып сағаты өтеді. Бұл – оқу жылын қорытындылап, маңызды әрі есте қаларлық сәттерді еске алуға арналған тәрбиелік шара.
Министрлік мәліметінше, сынып сағаты оқушылардың білімге деген құштарлығын, отансүйгіштік пен еңбекқорлық сияқты қасиеттерін дамытуға бағытталған.
Оқу жылының ресми аяқталуы жексенбіге (25 мамыр) сәйкес келгендіктен, 11-сынып бітірушілерге арналған салтанатты жиындар 23 немесе 24 мамырда мектеп әкімшілігінің шешімімен ұйымдастырылады.
Министрлік ата-аналар мен мектептерге ескерту жасады: барлық оқушыларға тең мүмкіндік пен қауіпсіз орта қамтамасыз етілуі тиіс. Осыған байланысты мектеп аумағынан тыс сән-салтанатты іс-шаралар өткізуге, ақша жинауға, автокөлікпен шерулер ұйымдастыруға және басқа да рұқсат етілмеген әрекеттерге жол берілмейді.
Фото: estu.1prof.by
