Аймақта шетелге заңсыз шығарылған активтерді қайтару есебінен 22 әлеуметтік нысанның құрылысы басталды.
Қаратал ауданындағы Дойыншы елді мекенінде медициналық пункт күзде пайдалануға берілмек. Сол кезде бас ауырып, балтыры сыздағандар 180 шақырым жердегі Үштөбе қаласына сабылмайтын болады. Ал Ұмтыл ауылының тұрғындары бірер айда таза су тұтына бастайды. Шағын әкімшілік аумақта орталық ауызсу жүйесі бұрын-соңды болмаған. Мердігер 3 шақырымнан аса құбыр тартып, жұмыстың басым бөлігін аяқтаған.
Мердігер Саятхан Нөкебаевтың айтуынша, қазіргі таңда жұмыстың 60-70%-ы орындалған. Қажетті материалдардың басым бөлігі сатып алынып, келісімшарт бойынша жұмыс қазан айының басында бітуі тиіс. Қолға алынған іс белгіленген уақыттан бұрын тамамдалмақ. Ауыл тұрғыны Мәулен Шоқпарбаев та өз қуанышымен бөлісіп, ауылға су келетініне ризашылығын білдірді.
А. Ыбырай
Қаратал ауданы
