Талдықорған қаласындағы Қазақстан Республикасы Ұлттық ұланы “Оңтүстік” өңірлік қолбасшылығының 5514 әскери бөлімінде 2024 жылғы бірінші шақырылым мерзімді әскери қызметшілерін салтанатты түрде шығарып салу рәсімі өтті.
Бұл ерекше шара – Отан алдындағы борышын абыроймен атқарған сарбаздарға көрсетілген құрмет пен ризашылықтың белгісі. Әскери бөлім басшылығы, офицерлер мен сержанттар, сондай-ақ ардагерлер кеңесінің өкілдері қатысқан кеш жылы шырайлы, патриоттық рухтағы атмосферада өтті.
Жауынгерлердің әскери қызмет барысында көрсеткен ерлігі мен табандылығы – үлкен үлгі. 5514 әскери бөлімінің жауынгерлері күнделікті қызметтік-жауынгерлік тапсырмаларды орындау кезінде батылдығымен, жеделдігімен, тәртібімен және ұйымшылдығымен көзге түсіп, Ұлттық ұлан беделін арттыра білді. Олар ұрпақтар сабақтастығын жалғап, аға буынның жауынгерлік тәжірибесін лайықты түрде жалғастырды.
Өткен жылдар ішінде әскери бөлімнің көптеген сарбаздары мен қызметкерлері ерекше тапсырмаларды орындау барысында көрсеткен ерлігі үшін Ұлттық ұлан Бас қолбасшысының, “Оңтүстік” өңірлік қолбасшылығы қолбасшысының, Талдықорған қаласы әкімінің және Жетісу облысы полиция департаменті басшысының атынан алғыс хаттармен және грамоталармен марапатталды. Сондай-ақ “Отан қорғаушының анасы” кеуде белгісімен марапатталған аналар да бар.
Айта кетерлігі, биыл 5514 әскери бөлімінің қатарынан 35 сарбаз мемлекеттік білім грантын иеленіп, жоғары оқу орындарында тегін білім алуға мүмкіндік алды. Бұл – әскери бөлім басшылығының, офицерлер мен сержанттардың сарбаздарға білім мен болашаққа бағыт беру жолындағы еңбегінің нәтижесі.
Сарбаздардың әскери қызметі – тек қана тәртіп пен жауапкершілік мектебі емес, сонымен қатар өмірлік дағдылар мен азаматтық позицияны қалыптастыратын маңызды кезең. Отан алдындағы борышын адал атқарған сарбаздар үшін бұл — үлкен өмірге батыл қадам.
