Қазақстандықтардың ең жиі тұтынатын медициналық препараттары анықталды, деп хабарлайды 7-su.kz ақпараттық порталы Денсаулық сақтау министрлігіне сілтеме жасап.
Ведомство мәліметінше, елімізде дәрілік заттарды міндетті таңбалау мен қадағалау жүйесінің енгізілуі мемлекетке дәрілердің қозғалысын толық бақылауға мүмкіндік берген. Бұл тұтынушылардың қауіпсіздігін арттырып қана қоймай, қазақстандықтардың қандай препараттарды және қашан сатып алатыны туралы нақты статистикалық мәліметтерді алуға жол ашты.
Ең көп сатылатын дәрі – парацетамол
Министрлік келтірген деректерге сәйкес, Қазақстанда ең көп сатылған таңбаланған препарат – парацетамол. Оның сатылған көлемі шамамен 3 миллион қаптаманы құрады.
Сатылым көлемі бойынша келесі орындарда тұрған препараттар:
-
Натрий хлориді
-
Этил спирті
-
Ацетилсалицил қышқылы
-
Цитрамон П
417 миллион қаптама дәрі таңбаланған
Бір жылдың ішінде ел аумағында 417 миллион дәрі-дәрмек қаптамасы таңбаланып, сатылымға шыққан. Бұл жалпы дәрі-дәрмек нарығының 60 пайызынан астамын құрайды. Оның ішінде:
-
252 миллион қаптама – импорттық препараттар
-
165 миллион қаптама – отандық өндіріс өнімі
Ең жоғары сұраныс – аптаның ортасында
Tañba жүйесінің деректері бойынша, дәрі-дәрмекке сұраныс аптаның ортасында, әсіресе сейсенбі мен сәрсенбі күндері жоғары болады. Демалыс күндері сұраныс төмендесе, дүйсенбіден бастап қайта өседі.
Ең көп дәрі сатылған өңір – Алматы
Жалпы елімізде бір жыл ішінде 107 миллион қаптама дәрі-дәрмек сатылған. Өңірлер бойынша сатылым көшбасшылары:
-
Алматы қаласы – 14,1 млн қаптама
-
Қарағанды облысы – 9,2 млн қаптама
-
Шымкент қаласы – 4,9 млн қаптама
