Жастардың тағдырына араша түсіп, болашағына бағдар болар мемлекеттік бағдарламалар осы күні қаз-қатар тізілді: «Жастар практикасы», «Дипломмен ауылға», «Отбасы банкі» АҚ арқылы ұсынылатын жеңілдіктер, «Алғашқы жұмыс орны», «Ұрпақтар келісімшарты» секілді бағдарламалар егжей-тегжейімен түсіндірілді. Қызығушылық танытқан қаракөз жастарға қайда барып, кімге жолығу керек, қандай мазмұндағы жоба ұсынғаны жөн, барлығы байыппен баяндалды. Брошюралар таратылып, әрбір сөз зерделі көңілге қонақтады.
Шара барысында келушілер тарапынан қойылған сан алуан сауалға нақты әрі толық жауап қайтарылды. Елдің еті тірі, рухы сергек екен. Талай жастың көзінде сәуле, жүрегінде жігер байқалды.
Бұл жолы жиналғандар саны елуге жуық болғанымен ықылас пен ниет мыңға татырлық. Себебі келгендердің бірі – жұмыс іздеп жүрген бозбала, екіншісі – ауылға барып еңбек етсем деген арман жетегіндегі бойжеткен, үшіншісі баспананың жолын қарастырған жас отбасы. Әрқайсысының арманы әртүрлі, бірақ үміт артқан мекені мемлекет ұсынған мүмкіндіктер.
Іс-шараның бел ортасында жүрген мекеме маманы Маржан Абдулманатова:
– Мұндай кеңес беру жұмыстары елмен етене жақын болудың, бір ауық жұртпен жүзбе-жүз тілдесудің таптырмас жолы. Бұл бастамалар уақыттың талабы ғана емес, жүректің қалауы. Әлі талай игі істерге ұйытқы боламыз, – дейді.
Расында, «Jetisý jastary» алдағы уақытта да осындай басқосуларды жиілетуді көздеп отыр. Ел қамын ойлаған елгезек жастардың еңбегі осылайша ел көңілінен шығып, үгіт-насихат жұмыстары нәтижелі түйінделді.
Көш бастайтын көсемнің, жол бастайтын ердің артында – рухани тірек, адами жылулық болуы шарт. Бұл жолғы «Adal komek» алаңы дәл сондай адалдықтың айғағы, ізгіліктің іргесі болды. Жас буынға бағыт, ұшқыр көңілге жігер берген бұл бастама ел ертеңінің іргетасын қалап жатқанын аңғартты.
С. КӘКІМҰЛЫ
