«Таза Қазақстан» республикалық бағдарламасына жетісулықтар белсенді атсалысуда. Аталмыш бастамаға осы уақытқа дейін 96 мыңнан астам өңір тұрғыны қатысқан. Дәл мұндай белсенділік нәтижесінде облыс аумағында 57 мыңға жуық ағаш отырғызылған. Облыстық энергетика және тұрғын үй-коммуналдық шаруашылығы басқармасының басшысы Айдос Бекетаевтің айтуынша, әсіресе, елді мекендерді абаттандыруға ерекше көңіл бөлініпті.
– Жыл басынан бері 25 балалар және спорт алаңы абаттандырылды. Тұрғындардың сұрауына орай 16 көпқабатты тұрғын үйдің шатыры қайта жаңғыртылды. Қала-аудан орталықтары мен елді мекендердегі жасыл желектің қурамай өсуін қамтамасыз ету мақсатында арық желілері жабдықталды. Ұрпақ сабақтастығын қалыптастыруда маңызға ие 69 ескерткіш қалпына келтірілді. Бұл атқарылған жұмыстардың бір парасы ғана. Қазір 21 саябақ, оның ішінде аллеялар мен скверлер бар, 2 орталық алаң, 3 ескерткіш, 51 аула мен 58 балалар ойнайтын спорт алаңқайы абаттандырылуда. Жыл соңына дейін жалғасатын жаңғырту жұмыстары қатарында 94 көпқабатты үйдің шатыры мен қасбетін жөндеу, 15,5 шақырым арық желілерін жабдықтау және 279 шақырым көшеге жарық шамдары орнату бар, – деді басқарма басшысы.
Айта кететін жайт, өңір жедел басқару орталығына қосылған. 14,8 мыңға жуық бақылау камерасы жұмыс істейді. Олардың бір бөлігі сыртқы бақылауды қамтамасыз етсе, тағы бір бөлігі білім беру мекемелерінде орнатылған. Аталған камералар «Таза Қазақстан» бағдарламасы аясында тазалықты қадағалауға мүмкіндік беріп отыр.
Сонымен қатар, арнайы телеграмм-бот іске қосылған. Осы уақытқа дейін 466 өтініш келіп түсіп, оның 404-і бойынша тиісті жұмыстар жүргізілген. Ал 62-сі бойынша нақты шешімдер қабылданбаған. Себебі, бұл өтініштердің «Таза Қазақстан» республикалық экологиялық бағдарламасына қатысы болмаған.
«Jetіsý-ақпарат»
