Мемлекет басшысы Қасым-Жомарт Тоқаев құқық қорғау органдарының кеңейтілген алқа мәжілісінде интернет және телефон арқылы жасалатын алаяқтықпен күрес мәселесіне ерекше назар аударып, бұл бағытта кешенді шаралар қабылдау қажеттігін мәлімдеді.
Президенттің айтуынша, цифрлық технология дамыған сайын қылмыскерлер де айла-тәсілдерін түрлендіріп, жаңа жолдармен әрекет етуді меңгеруде. Бұл – бүкіл әлемге ортақ күрделі проблема.
–Интернет және телефон алаяқтығының алдын алу мәселесіне арнайы тоқталғым келеді. Қылмыстың бұл түрі бүкіл әлемде белең алды. Көбіне мұндай іске тыңғылықты ұйымдасқан қылмыстық топтар барады. Олар шетелден әрекет ететіндіктен, тергеу амалдарын қиындатады. Сондықтан бұл ретте алдын алу шараларының мәні зор, – деді Қасым-Жомарт Тоқаев құқық қорғау органдарының кеңейтілген алқа мәжілісінде сөйлеген сөзінде.
Президенттің мәлімдеуінше, өткен жылы Ұлттық банк жанынан заманауи антифрод-орталық ашылып, күмәнді операцияларды анықтап, уақтылы бұғаттау жұмыстарын жүргізіп келеді. Сонымен қатар, банктер мен ұялы байланыс операторларының алаяқтық әрекеттерге жол бермеу бағытындағы жауапкершілігі де күшейтілуде.
Азаматтарымыздың жеке мәліметтерінің сенімді жерде сақталуын қамтамасыз ету өте маңызды. Халықтың қаржылық сауатын арттырып, қоғамда алаяқтардың әрекеттеріне иммунитет қалыптастыру үшін барлық деңгейдегі депутаттармен бірлескен жұмысты күшейткен жөн, – деді Мемлекет басшысы.
Президент алаяқтардың түрлі тәсілдермен адамдарды алдап, қаржыларын жымқыруда екеніне алаңдаушылық білдірді. Соңғы бір жарым жылда 50 мыңнан астам азамат алаяқтардың құрбанына айналған. Оның ішінде жастар үлесі басым.
Азаматтарымыз пайдаға кенелеміз деп банк есепшоттарын беріп қояды. Бірақ бұл әрекеттерінің салдары қандай ауыр болатынын ойлай бермейді, – деді Тоқаев.
Мемлекет басшысы Қаржы нарығын реттеу және дамыту агенттігіне банктермен бірлесіп, күмәнді есепшоттарды алдын ала анықтап, бұғаттайтын тиімді жүйе құруды тапсырды.
Сонымен қатар, бақылаусыз сим-карта айналымы да алаяқтықтың белең алуына себеп болып отыр. Президенттің дерегінше, тек 2025 жылдың өзінде 100 мыңға жуық сим-карта басқа тұлғалардың атына рәсімделген.
Үкіметке уәкілетті органдармен бірлесе сим-карталарды сату тәртібін реттеуді және оларды таратқаны үшін мобильді операторлардың жауапкершілігін күшейтуді тапсырамын, – деді Қасым-Жомарт Тоқаев.
«Жетісу-Ақпарат»
