Желтоқсан айының басында редактор шақырып: «Ақсу ауданына барасың, мал қыстатудың жайы нашар, сын жазып кел» деп тапсырма берді. Бұл менің ауданға шыққан алғашқы іссапарым болатын. Бастық тапсырма берген соң арқаланып, қоғам малын дұрыс қыстатпай отырғандардың жазасын бермек болғаным да рас.
Сөйтіп, Ақсу ауданының орталығы Жансүгіров кентіне жолаушылар автобусына отырып, түске таман жеткенмін. Түскі үзілістен кейін аупарткомның бірінші хатшысы Наурыз Қылышбаевтың кабинетіне кірдім. Сұңғақ бойлы, сұлу тұлғалы хатшы мені жылы қабылдап, қайсы шаруашылықтарға баратынымды, негізгі мақсатымды сұрады. «Сіздің ауданда мал қыстату науқаны нашар көрінеді, сол жөнінде сын жазбақпын», – деп ағымнан жарылып шынымды айттым. «Е, жөн екен» деді хатшы. Шынында да биыл өңірде қыс қатал болып тұр, мал қыстатудан мақтана алмаймыз, жағдайды өз көзіңмен көріп, сынай жатарсың», – деп ауыл- шаруашылық бөлімінің бастығы Кузнецов дегенге жіберді.
Қабылдау бөлмесіндегі хатшысы қазір келіп қалар деген ауылшаруашылығының басшысы қыстың қысқа күні ұясына беттегенше келмеді. Отыра-отыра ойға батып, өзімнің қате қадам жасағанымды аңғардым. Бастықты күте-күте күдерімді үзіп, сыртқа шыққанымда кәдімгідей кеш болып қалды. Көшеде бұрын облыстық газеттің Ақсу ауданындағы меншікті тілшісі болған марқұм Жамау Бұқарбаев жолығып қалып, іссапардың жай -жапсарын сұрап білген соң, қарқылдап бір күліп алды да: «Сынаймын деп бекер айтқансың, оларға мақтауға келдім десең көлігіңді де, қонақасыңды да дайындап қояр еді. Енді Діңгекке баратын соңғы автобусқа үлгір», – деп жөн сілтеді.
Автобекетте Діңгек ауылына баратын жолаушылар автобусы жүргелі тұр екен. Соған міндім де бұрын аяқ баспаған, бейтаныс ауылға беттедім. Діңгектегі кеңшардың қос қабатты кеңсесінде күзетшіден басқа тірі жан жоқ. Күзетшінің айтуынша, аупарткомның бірінші хатшысы келіп, басшылардың бәрі сол кісімен бірге малшыларды аралауға кетіпті. Бағана аупарткомның бірінші хатшысына шынымды айтып, өз алдыма өзімнің түскенімді ішім сезді. Күзетшіге телефон шалдырып жатып, түннің бір уағында Болат есімді партия ұйымының хатшысын әрең тауып, соның үйіне түнеп шықтым.
Ертесінде әупірімдеп жүріп ауылға жақын маңдағы бірер мал қыстауын көрген болдым. Содан Ақсу ауданының Қаракөз деген ауылын айналып, Талдықорғанға қайттым. Бұл сапарымнан мал қыстату туралы жөнді сын жаза алмадым. Алайда жол жөнекей көрген ел тірлігінен суреттеме, репортаждар жазып, іссапар парызын өтедім. Айтайын дегенім, сол алғашқы сапарымнан өміріме үлкен сабақ алып, барған жерімде ешкімге сынайтын едім деп айтпайтын болдым.
Мырзағали НҰРСЕЙІТ
