Жаздың аптап ыстығы тек демалыс пен серуендеуге ғана емес, денсаулығымызға да үлкен сынақ. Ауа температурасы көтерілгенде ағзаға түсетін салмақ артады, қан айналымы мен жүрек жұмысы күшейеді, термен бірге маңызды тұздар мен су тез шығып кетеді. Бұл өз кезегінде әлсіздікке, бастың айналуына, қан қысымының ауытқуына, тіпті ауыр жағдайларға әкелуі мүмкін. Сондықтан ыстық күндері денсаулығыңызды сақтаудың қарапайым, бірақ маңызды қағидаларын білу — әр адам үшін қажет.
Бірінші және басты ереже — ағзаны сусыз қалдырмау. Ыстық кезде терлеу арқылы көп мөлшерде сұйықтық жоғалтады. Сол себепті күні бойы жиі су ішіп отырыңыз. Шөлдеген кезде ғана емес, әр сағат сайын аз-аздан су ішкен дұрыс. Газдалған, тәтті сусындар мен кофеинді ішімдіктерден бас тартқан жөн, себебі олар ағзаны керісінше сусыздандырады. Мүмкіндігінше таза су, минералды су, жеміс-жидек қосылған салқын компот, шөп шайы пайдалырақ.
Екінші — дұрыс тамақтану. Ауыр, майлы тағамдарды ыстықта асқорыту қиынға соғады. Сондықтан рационға көкөніс пен жемістерді, жеңіл сорпа мен қайнатылған ет, балық қосыңыз. Қарбыз, қауын сияқты маусымдық жемістер ағзаға су мен дәрумендерді толтыруға көмектеседі. Күннің ең ыстық уақытында көп мөлшерде тамақ жемеген абзал.
Үшінші — күн сәулесінен қорғану. Таңғы сағат 11:00-ден түскі 17:00-ге дейін күн өте қауіпті болып келеді. Бұл уақытта мүмкіндігінше көлеңкеде болыңыз. Көшеге шығарда бас киім киіп, ашық түсті, жеңіл, табиғи матадан тігілген киім таңдаңыз. Бет пен қол терісін арнайы күннен қорғайтын креммен майлаңыз. Бұл терінің күйіп кетуінен және қартаюынан сақтайды.
Төртінші — дене температурасын бақылау. Ыстықта ұзақ жүргенде немесе ауыр дене еңбегін істегенде ағза қатты қызып кетеді. Бұл қауіпті жағдайларға — күн өтуге, қан қысымының күрт төмендеуіне әкелуі мүмкін. Егер басыңыз айналып, жүрегіңіз айнып, әлсіздік сезінсеңіз, дереу көлеңкеге шығып, су ішіп, тынығыңыз.
Бесінші — балалар мен қарт адамдарды ерекше қорғау керек. Себебі олардың ағзасы температураны реттеуге қабілеті әлсіздеу. Балаларды күнге ұзақ шығармаңыз, қарт адамдардың қан қысымын тексеріп тұрыңыз, оларды да жеткілікті мөлшерде су ішуге шақырыңыз.
Алтыншы — көлік ішінде абай болыңыз. Көліктің жабық салонда температура сырттағыдан әлдеқайда жоғары болуы мүмкін. Сондықтан көлікті көлеңкеге қойып, салонын желдетіп отырыңыз. Баланы немесе жануарды жабық көлікте қалдырмаңыз — бұл өмірге өте қауіпті.
Жетінші — физикалық белсенділікті шектеу. Спортпен айналысуға немесе ауыр жұмыстар істеуге таңертең ерте немесе кешкі уақытта уақыт бөліңіз. Күннің қызуы күшейген уақытта ағзаны шамадан тыс шаршатпаған дұрыс.
Соңында айтарымыз — ыстық жаз күндері де адам үшін пайдалы әрі көңілді өтуі үшін денсаулыққа ұқыпты қарау қажет. Уақытылы су ішіп, дұрыс киініп, өзіңізді және жақындарыңызды күтіңіз. Күннің астында артық жүрмей, көлеңкені, салқын жерді таңдаңыз. Әр адам өзінің ағзасын тыңдап, ыстықтан сақтану шараларын дер кезінде жасауы керек. Денсаулығыңыз — өз қолыңызда.
«Жетісу-Ақпарат»
