1 маусымдағы жағдай бойынша Бірыңғай жинақтаушы зейнетақы қоры (БЖЗҚ) қазақстандықтардың атына ашылған 264 мыңнан астам зейнетақы шотында 37,3 миллиард теңге сұралмай, иесіз күйде сақталып тұрғанын хабарлады. Қор өкілдері бұл қаражатты алуға құқығы бар азаматтар әлі күнге дейін тиісті рәсімдерге жүгінбегенін айтып, халыққа арнайы үндеу жасады, деп хабарлайды 7-su.kz ақпараттық порталы.
Кімдердің атына қаржы жиналып тұр?
БЖЗҚ мәліметінше, 37,3 миллиард теңге мынадай азаматтардың шоттарында қалып отыр:
-
148 335 адам қайтыс болған – олардың зейнетақы жинақтарын мұрагерлері рәсімдей алады;
-
59 800 адам шетелге тұрақты тұруға кеткен – бұл азаматтар да жинақтарын алуға құқылы;
-
56 560 адам зейнетке шыққанымен, тиісті өтінішпен жүгінбеген.
Бұл қаржы қайда сақтаулы?
Қорда жатқан бұл қаражат иелерінің жеке зейнетақы шоттарында сақталып, инвестициялау арқылы көбейтіліп жатыр. Инвестициялық басқарумен Қазақстан Ұлттық банкі және жекеменшік портфельді басқарушы компаниялар айналысады.
Жинақты қалай алуға болады?
Егер адам зейнет жасына жеткен болса, бірақ зейнетақысын рәсімдемеген болса, онда ол тұрғылықты жеріндегі Халыққа қызмет көрсету орталығына (ЦОН) барып өтініш беруі керек.
Ал Қазақстаннан тұрақты тұру үшін кеткен шетел азаматтары мен азаматтығы жоқ тұлғалар заңға сәйкес қажетті құжаттар пакетін тапсыру арқылы өз жинақтарын ала алады.
Қайтыс болған адамның жинағы қалай беріледі?
Марқұмның жинақтары мұрагерлік тәртіппен рәсімделеді. Сондай-ақ, қайтыс болған адамның жақындарына бір реттік жерлеу төлемі беріледі. Оның мөлшері сол жылға белгіленген 94 айлық есептік көрсеткіштен (АЕК) аспауы тиіс және шоттағы қаражат көлемінен артық болмауы қажет.
Мұрагер зейнетақы жинағын рәсімдеу үшін қайтыс болғаннан кейін 6 ай ішінде нотариусқа жүгініп, мұрагерлік туралы куәлік алуы керек. Егер бұл мерзім өтіп кетсе, сот арқылы мерзімді қалпына келтіру жолымен жинаққа деген құқығын дәлелдей алады.
Қор ескерту жасады
БЖЗҚ өкілдері азаматтарға зейнетақы жинақтарын иесіз қалдырмай, уақытында рәсімдеуді ескертеді. Бұл болашақтағы құқықтық қиындықтардың алдын алады және қаражаттың тиісті иелеріне жетуіне мүмкіндік береді.
