Аяз қайта оралды
Ақмола және Павлодар облыстарының батысы мен солтүстігінде түнгі уақытта ауа температурасы 2 градусқа дейін төмендеп, аяз болады деп болжануда. Сонымен қатар, 26 мамыр күні де Ақмола облысының батысы, солтүстігі және шығысында аяз сақталуы ықтимал.
Найзағай мен бұршақ: қауіпті құбылыстар күтілуде
Көптеген өңірлерде найзағай ойнап, кей жерлерде бұршақ жауады. Атап айтқанда, Алматы, Жетісу, Абай, Шығыс Қазақстан, Қарағанды, Ақтөбе, Ақмола, Қостанай, Солтүстік Қазақстан, Ұлытау, Павлодар, Түркістан және Жамбыл облыстарының тұрғындарына ауа райының күрт өзгеруіне дайын болу ескертіледі.
Жамбыл облысының таулы аудандарында қатты жаңбыр күтіледі.
Үш ірі қалада да найзағай
Алматы, Шымкент және Қонаев қалаларында күннің екінші жартысында найзағай, бұршақ және жауын-шашын болады деп болжанған.
Жел екпіні 28 м/с дейін күшеюі мүмкін
Жетісу, Алматы, Қарағанды, Ақмола, Түркістан, Ұлытау, Абай, Қостанай және Қызылорда облыстарында жел күшейіп, жылдамдығы 15-28 м/с дейін жетуі мүмкін. Бірқатар өңірлерде дауыл соғуы да жоққа шығарылмайды.
Шаңды дауыл мен тұман
Қызылорда және Түркістан облыстарының кей аймақтарында, әсіресе шөл және ашық жерлерде шаңды дауыл тұруы ықтимал. Ал Маңғыстау, Қостанай және Солтүстік Қазақстан облыстарының кей аудандарында түнгі және таңертеңгі уақытта тұман күтіледі.
Өрт қаупі өте жоғары
Құрғақ әрі желді ауа райы табиғи өрт қаупін күрт арттырып отыр. Алматы, Жетісу, Түркістан, Атырау, Ақтөбе, Қызылорда, Қарағанды, Ұлытау, Абай, Павлодар және Шығыс Қазақстан облыстарында жоғары және төтенше өрт қаупі сақталады.
Синоптиктер ел тұрғындарын ауа райының қолайсыздығына байланысты абай болуға, ұзақ жолға шықпауға және қауіпсіздік шараларын сақтауға шақырады.
