Еркіндегі ақсақалдардың басқосуы құр шүйіркелесу емес, бұл тозғанды түгендейтін, үзілгенді жалғайтын, ертеңгі күннің еңсесін тіктейтін елдік кеңес. «Төрдегі қария – ақылдың дариясы» деп білетін жұрттың санасында ақсақал сөзі бата ғана емес, бағыт, өнеге ғана емес – өріс.
Мұндай мәслихатта елдің ертеңі талқыға түседі, жұрттың жайы сөз болады. Көкірегі ояу, көзі қырағы, көңілі кең қариялар қай істі де сабырмен саралап, салмақпен шешеді. «Ақыл – ойдың шырағы, қария – елдің шырағы» екенін ісімен дәлелдеп келеді.
Атап айтқанда, ауызы дуалы ақсақалдар атқарған жұмыс көп. Мәселен, Еркін ауылында сонау Екінші дүниежүзілік соғыста шейіт болған боздақтарға арналған еңселі ескерткіш бой көтерген. Бұл – өшкенді жандырып, ұмытылғанды еске салған тағзым ескерткіші. «Өлі риза болмай, тірі байымайды» деген тәмсілді ту еткен қариялар бұл істі бүгінгі ұрпақтың санасына сіңіру үшін ғана емес, жүрегіне қондыру үшін атқарды.
Бұл мәртебелі шаруаның басында жүрген ел жанашырлары – Мұрат Өсербаев пен Темірболат Ақажановтай азаматтар. Олар – «жақсының жақсылығын айт» деген қағиданың жаршысы, халқына адалдықпен қызмет еткен тағылым иелері.
Еркін ауылындағы қырық жылдан астам уақыт халыққа қызмет етіп келген ескі аурухана бүгінде заман талабына жарамай, елдің көңіліне кірбің түсірген еді. Осы мәселені біраздан бері қаузап жүрген ауыл халқының аманатын арқалаған қариялар облыс әкіміне дейін барып, ел тілегін дәтпен жеткізген. Сөйтіп, көп уақыт өтпей-ақ ауыл төрінде қос қабатты еңселі жаңа аурухана бой көтерді. Бұл – тек бір нысанның салынуы емес, бұл – ақыл мен табандылықтың жеңісі. «Сөзі өтімді қария ісі берекелі болар» деген осы.
Қариялардың бастамасымен қолға алынған келесі ірі жоба – «Көктал» шағын ауданындағы 4,5 гектар аумақты алып жатқан жаңа саябақ. Бұл – жай ғана ағаш отырғызып, орындық қойған демалыс орны емес. Бұл – елдің рухани тынысы, ұрпақтың серуенінен сырлы тәрбие алатын шырайлы кеңістік. Жасыл желекке оранған бұл нысан – туған жерге деген тағзым мен табиғатты аялаудың айқын үлгісі.
Мұнымен тоқтамай, алдағы уақытта ауылда Мәдениет үйі де салынбақ. Бұл – ұлттық өнер мен дәстүрдің алтын бесігі болар рухани ордаға айналуы тиіс.
Ауыл аманатын арқалап жүрген ақсақалдар алқасының төрағасы, Талдықорған қаласының Құрметті азаматы Тортай Ізбасқанов:
– Ең бастысы – елге пайдалы іс жасау. Қазірдің өзінде аурухана мен саябақ ел игілігіне жарап тұр. Сондай-ақ, «Көктал» шағын ауданында 1200 орынды мектеп салынғалы жатыр. Бұл 2026 жылға ойластырған жоспар. Сонымен қатар, алдағы уақытта спорт кешені мен балабақша да салынса. Бұл – бүгінгі ғана емес, келешек ұрпақтың игілігі үшін қажет дүние, – дейді.
Расында, ұрпақ қамын ойламаған ұлттың ертеңі – бұлыңғыр. Ал Тортай сынды ақсақалдар ұрпақтың болашағын білетін жандар.
Еркіннің тамырына қан жүгірткен тағы бір игі іс – Балықты өзеніне салынған плотина. Бұл жоба тек ауылшаруашылығына ғана емес, тұтас округтің тұрмыстық жағдайына серпін берді. Осы тіршілік көзін уақытылы бағыттау – ақыл мен алысқа көз тіккен көрегендіктің жемісі.
Бүгінде Еркін ауылдық округіндегі ақсақалдар алқасында 21 адам еңбек етуде. Олардың төртеуі Талдықорған қаласының Құрметті азаматтары болса, өзгесі – білім саласынан зейнетке шыққан белсенді тұлғалар. Кімге болмасын ісімен де, сөзімен де үлгі болатын жандар.
Солардың бірі – тағылымы терең, бар ғұмырын мектептегі қызметке арнаған ұлағатты ұстаз – Насиха Уалиева. Еркін ауылының Құрметті азаматшасы ауылын ойлап бәйек, айтса сөзі дәйек. Әлі күнге дейін балаларға білгенімен бөлісіп, ақылын айтып, жастарды жөнге салып жүр.
«Ел иесі – ер, ердің тірегі – қария». Халық осыны білген, осыны бекем ұстанған. Сондықтан Еркіндегі ақсақалдардың өнегесі – тек бір ауылға ғана емес, бүтін елге ортақ өрнек.
Ауыл деген – алтын бесік. Ал сол бесікті тербетіп отырған ардақты қариялар – елдің рухани діңгегі, уақыттың аманат иелері.
Санжар СҰЛТАНҒАЗЫ
